لقاء مع المخلوع / مسرحية ذات فصل واحد

يضاء المسرح فيبدو المنظر عبارة عن غرفة في مستشفى استثماري حيث يوجد سرير وانتريه وجهاز تلفاز متصل بطبق فضائي وديب فريزر ودولاب ومنضده انيقه وزهور تملأ المكان بطريقة توحي بالبهجة والراحة النفسية

يدخل المحامي حيث يرقد المخلوع على السرير وفي يده ريموت يتابع قناة اخبارية عربية يتحدث فيها احد الضيوف من الثوار وبجواره تجلس زوجته في كامل زينتها

ص . المواطن	: ( من خلال التلفاز ) انا موش عارف الراجل ده جنسه ايه وللا ملته ايه .. ده لا نخوه ولا عروبه ولا ضمير ولا اخلاق .. 30 سنه كوارث بتحصل في البلد وفي المنطقة وعمري ما شفته اتحرك غيران على قضية من قضايانا اللي مات علشانها أباهاتنا وجدودنا .. حسبي الله ونعم الوكيل فيه .. حسبي الله ونعم الوكيل
المحامي	: ( بتعاطف مصطنع ) موش ضروري تتفرج على الحاجات دي يا ريس .. كله كلام ملوش لزمه .
المخلوع	: ( بلامبالاه ) ابدا يا متر  .. انت فاكر ان الحاجات دي بتأثر في او بتهزني .. بالعكس .. انا بنبسط جدا لما بشوف الحاجات دي .. انا قلت في اول خطاب اني موش الرئيس اللي يتغر بهتاف بالروح بالدم .. ومع ذلك كانوا بيقولولي بالروح بالدم برده .. قلتلهم في اول خطاب اني لما اموت هاتقولوا ينعل ابو اللي جابك ، مصدقونيش .
الزوجة	: دي بقت حاجة مقرفه  ،   اللي موش لاقي حاجة يعملها في دنيته ، أو اللي مرآته موش مريحاه في نومته ، بقى بيطلع في فضائيات يشتم في الريس   .
المحامي	: أو يدخل يشتم على النت .
الزوجة	: على رأيك ، النت اللي ابو طويله قالنا انه هايقعد الشعب في بيته وينسيه مشاكله ، واتاريه هوه اللي قلب الناس علينا ، رغم اننا عمرنا ما حظرنا عليهم موقع اباحي او غير اباحي  ، حتى المواقع اللي كانت بتشتمنا كنا سايبنهالهم ينفسوا فيها  .. يللا .. ندالة شعب ، المهم احنا لازم نفكر في التحقيق اللي هايبدأ كمان شويه .. اللي راح راح والجاي هوه المهم .
المحامي	: مظبوط يا هانم ، علشان كده انا جيت بدري  ساعة free  يعني موش ح حاسب فخامته عليها .. بس المهم فخامته يبطل عند ويلتزم باللي اتفقنا عليه .. ومفهاش حاجة لما يكسب تعاطف المحققين ومن وراهم تعاطف الشعب ، ده شعب عاطفي وحنين وفخامتك سيد العارفين .
المخلوع	: مهو انا عملت كده في خطبه من الخطب .. الخطبه اللي قلت فيها عاوز اموت واتدفن هنا ، موته تآخدهم واحد واحد ..  شعب تلم معندوش دم ، اسألني انا علي الشعب ده .. هما سابوا ريس في حاله .. ده حتى عبد الناصر اللي كان يرعب العفريت طلعوا بمظاهرات في أواخر ايامه .. والسادات اللي كان يقرطس القرطاس نفسه ، شوف عملوا معاه ايه .. يا راجل ده نابليون بجلاله قدره مطاقهمش سنه وهرب ، واراهنك لو قدروا يعمروا مع ريس زي ما عمروا معايا 30 سنه .. صحيح ، عملتلي ايه في مكآفأة نهاية الخدمة ..   تلاتين سنه رئيس وست سنين نائب .. انا موش هاسيب مليم لولاد الكلب دول .
الزوجة	: لا ما نسيبش طبعا .. نسيب ليه ، موش ده القانون اللي فضحونا عليه في كل حته .. خلاص يطبقوا القانون ويدونا معاشنا .
المحامي	: يا ريس انا لو قدمت طلب بصرف مستحقاتك دلوقتي والصحافة شمت خبر وأكيد هاتشم طبعا .. الرأي العام هايهيج ضدك تاني ، هايقولوا شهدا ومصابين واشغال اتعطلت وده بيدور على مكآفأة نهاية خدمته ، صعبه برده ..  احنا عاوزين نهدى مع الناس .
المخلوع	: الرأي العام عمره ما ح يهدى معايا بعد الغزة بتاعة الجارديان .. ( لزوجته ) الانجليز قرايبك اللي جابوا عيل عمره 35 سنه يحكمهم على آخر الزمن ، حبكت ينشروا قصة الــ 70 مليار والشعب هايج علي ، هوه انا كنت قصرت معاهم او حتى مع الاميركان في حاجة ، لكن اقول ايه ، جنس نتن ما بيتمرش فيه  .. ( للمحامي ) واللي فاقعني اكتر ندالة اليهود ، طب انا كنز استراتيجي خليها في سرك ما تصيحش ، حقاني قوي ، كلمة الحق بتنقح عليك دلوقتي  ،  وقبلها وانا في المانيا آلاقي اخبار منشورة في جرايدهم ان حاخامات اليهود بيدعولي اني أخف .. طب ما تدعي في سرك يا بن الكلب منك له .. هي الدعوة موش هاتستجاب الا لو مانشيت  في هآرتس وللا معاريف .
الزوجة	: انا موش عارفة الغباء اللي نزل عليهم فجأة ده سببه ايه ؟ طول عمرهم اذكياء .. اشمعنى بيتغابوا على حظنا .
المخلوع	:   موش غباء يا خفه .. ده نتانياهو النفسية .. غيران منى من اول مره اتولى فيها ايام كلينتون والبت مونيكا لما كان داخل علينا بالحنجرة وانا سخنت الدنيا عليه علشان يتعلم اصول اللعبة .. شايلهالي من ايامها وانا عارف قلبه .. بس ميقدرش يعمل معايا حاجة مباشرة تضرني في ولايته دي .. الاحزاب الاسرائيلية كانت تآكله وتسقطه في الكنيست والجيش الاسرائيلي كمان بيأيدني علشان الوفر اللي عاملهوله في المنطقة الجنوبية عندهم ووقفتي في حرب حزب الله وغزة .. يقوم البيه بيضرب تحت الحزام ومعاه شوية صحفيين يهود مرتشين ، بيتدفعلهم ، فيفهم الشعب عندي اني صاحب اليهود وحبيبهم وحاميهم .. والاغبياء اللي هنا موش فاهمين ان الزعماء هما كمان بينفسنوا على بعض  .. فاكرينا علشان زعماء نبقى ملايكة نزلنا من الاسانسير . ( يضحك )
المحامي	: يا ريس المحققين على وصول .. واقوال سيادتك مهمة جدا في القضية .. وفيه ناس قلقانه ، انا تليفوني مبطلش رن توصيات عليك من اخوانا في الخليج .. مشاعرهم صادقة جدا ناحية فخامتك ، ما بيناموش من كتر القلق .. وانا عاوز اطمنهم .
المخلوع	: انا موافق على حكاية ما بيناموش من القلق دي .. لكن موضوع  المشاعر ده واسع منك شوية .. محدش عنده مشاعر لحد غير لولاده .. والباقي كله مصالح .. الخليج خايف اتكلم .. 30 سنه في الحكم  تخيل كم البلاوي اللي اعرفها .. بس طمنهم .. عرفهم اني تقيل .. واعصابي هادية .. مبتربش   .. لكن ساعة الضرورة ، ياروح ما بعدك روح طبعا .
المحامي	: يا ريس ارجوك ريحني ،  كل دي مناهده علشان جملتين في التحقيق .. كان الله في عون الهانم .. اكيد ياما ناهدت مع فخامتك .
الزوجة	: قوله .. عرفه .. اصله فاكر نفسه امله .. دايما يقولي بوسي ايدك وش وضهر اني اتجوزتك وعملتك سيدة اولى .. اخرتها ايه ، بقينا كلنا حبسجية .
المخلوع	: اللي بيحصل ده بسبب زنك والنزناز اللي في دماغك  .. قعدتي تقولي لازم نورث الحكم للواد ، موش هاستنى لما يحصل لي اللي حصل لجيهان .. اهو ياريتك حصلتي ربعها .. على الاقل هيه دلوقتي دكتورة في امريكا وليها كتبها وتلامذتها والناس كلها بتحترمها .. لكن انت ، محدش عارف بكرة بالنسبة لك هايكون فيه ايه ؟ ( يضحك ) اسرب موضوع اللوح الفنية .
الزوجة	: قصدك ايه ؟ جيهان احسن مني ؟
المخلوع	: طبعا .. السادات اصله عُقر .. عرف ينقي .. لكن انا الطيران خد كل وقتي علشان كده اتسرعت في الجوازه دي .
الزوجة	: طب ومستني ايه ؟ ما تصلح غلطتك وتطلقني .
المخلوع	: اسكتي بدل ما اعملها بجد .. واسرب اخبار انك ندله .. اتخليتي عني في محنتي .. وده هايخلي الشعب يتعاطف معايا زي   المتر ما هو عاوز .
المحامي	: ( باعجاب ) هايل يا ريس ، فكرة تستحق الدراسة فعلا .. والصحف بقى .. ياترى هيه اللي طلبت الطلاق ولا هوه اللي طلق من نفسه .. طب ياترى شتمته او عايرته بأصله .. واحنا شعب يموت ينم في المسائل دي .
الزوجة	: يقوم الشعب يتعاطف معاه ويعدوا قرار عفو يصدر من المجلس ، ماشي  ، طب وانا .
المخلوع	: ها يكرهوكي عما اكتر ما هما كارهينك .
الزوجة	: بس انا يا حبيبي موش موافقة اتطلق .
المحامي	: يا هانم لو درسنا الموضوع بجد واتاكدنا انه ضرورة سياسية ملحه .. اعتقد ان سيادتك ح توافقي على التضحية .
الزوجة	: آآه .. واطلع انا الواطية قليلة الاصل اللي كلت الراجل الكبير العيان لحم ورميته عضم .. وهوه الغلبان البريء يا عيني ،  الضحية   اللي مراته سابته لوحده في اصعب الظروف ، وتدوروا له على عروسه بالمره .. وياريت تكون واحده من الثوار ، اقولك جيهان فاضل مناسبه اصله طول عمره بيحب الممثلات وبيحب كمان اسم جيهان ..
المخلوع	فعلا .. برافو عليكي بجد .
الزوجة	ده على جثتي انه يحصل .. ده انا افضحكم في كل حته واخلي اللي ما يشتري يتفرج ، ده انا اشغل النت 30 سنه على فضايحكم .. ما تنسوش ان اخويا هرب على لندن اول ما الثورة قامت .. وانا على اتصال بيه .. واي حركة ندالة هايكون لي تصرفي تاني .. مفهوم وللا اقول كمان .
المخلوع	: ( ملتفتا للمحامي ) دور على فكره تانية يا متر .. اللعب مع الهانم غير مأمون العواقب .. بل دائما ما بنبيء بعواقب وخيمة .. وياريت تسمع نصيحتي وما تعملش زي صدام .
المحامي	: مقولتش حاجة يا ريس .. لكن بصراحة  فخامتكم لايقين على بعض جدا ، استايل بعض يعني .. انا عمري ما شفت اتنين كده في حياتي .
الزوجة	: قوله .. علشان يفهم ويقدر .. موش يقولي جيهان .. هيه فين وانا فين .. هيه ركبت عشر سنين .. انا ركبت 30 سنه .. وبعدين عملت كام فلوس يعني من الحكم .. ده انا عملت  .....
المخلوع	: بس .. اكتمي .. ده المحامي اللي ها تحاسبيه في الآخر .. فاهمه وللا فاكره نفسك هاتفضلي مقضياها استعباط .. خلاص فوقي ، مبقيتيش سيدة اولى الكل هايطاطيلك .. يعني الباقي من حياتك هايبقى بالورقة والقلم .. والكلمة هاتتحاسبي عليها .
المحامي	: لا .. استعباط مين يا ريس .. ده انا محامي .. وشرفي هوه اتعابي .. واديك شايف .. الشعب كاره امي علشان بدافع عنكم .
المخلوع	: وانت يهمك ايه ؟ انت زباينك من الشعب .
المحامي	: لا طبعا ، لكن ....
المخلوع	: ملكنش .. انت دلوقتي شعبيتك بتزيد عند الكبار .. وده اللي يجيب لك البهاريز يا خفيف  .
المحامي	:  احبك يا ريس .
المخلوع	: تبقى حمار .
المحامي	: بجد بحبك ، أصلي شفت خير في عهدك .
المخلوع	: تبقى آفاق .
المحامي	: قصدي يعني عملت فلوس   .
المخلوع	: يبقى معندكش ضمير .
المحامي	: يا ريس بحبك وخلاص .
المخلوع	: انت كده هاتقلقني منك .
المحامي	: قصد فخامتك ايه ؟
المخلوع	: شوف ، تقولي انك هاتدافع عني علشان مبلغ كذا .. هفاصلك طبعا وازهقك فصال .. بس هابقى متطمن وانا معاك .. لكن تقولي بحبك والجو ده .. هقولك اتصل بصفوت او زكريا يحددولك معاد .. بس تبعد عن القضية .. ( ملتفتا الى زوجته ) محاولتيش تاني مع مرتضى .
المحامي	: لا مرتضى ايه .. انا لا بحبك ولا حاجة .. دي كانت دخله كده علشان تراضيني في الحساب .
المخلوع	: ايوه كده تعلالي في العدل احسن لك ، وما تنساش اني منوفي .
المحامي	: طيب نرجع لموضوعنا الاساسي .. عاوزين نرتب مع بعض كلمتين يخلوا الشعب يحبك .
المخلوع	: انا لو كنت في السلطة كنت كلمتهم في علاوه وللا منحه 50 جنية .. اصله شعب جعان كل همه على بطنه .. انت فاكر السادات شربهم السلام مع اسرائيل ازاي .
المحامي	: ازاي .
المخلوع	: دخل عليهم دخلت الرخاء .. فهمهم ان السلام هايجيب رجاء .. والرخاء هايجيب لحمه .. دول خرجوا في يناير 77 علشان كيلو الرز غلي تعريفه ومخرجوش وهوه بيمضى مع بيجن في كامب ديفيد .
المحامي	: طيب ايه رايك تعلن عن تبرعك بمبلغ لاهالي العشوائيات مثلا
المخلوع	: ليه ؟ هيه الفلوس دي كنت لاقيها وللا كنت لاقيها .. وبعدين اتبرع لبتوع العشوائيات .. طب ده انا كنت عاملهم عبره للشعب .. علشان الطبقة المتوسطة اللمضة تبص لبتوع العشوائيات ويحسوا انهم في نعمة
المحامي	: طالما موش عاوز تدفع يبقى مفيش غير الكلام .. انا رأيي يا ريس انك  تقول في التحقيق انك بتحب الشباب .. ولما كنت فاكر ان الكورة هيه كل حياتهم جبتلهم كاس افريقيا 5 مرات في عهدك .. وانهم لو كانوا فهموك انهم عاوزين يعيشوا زي البني آدمين مثلا اكيد كنت اهتميت عشانهم برده بحاجات تانية كتير زي ما كده اهتميت بالكورة وبرجال الاعمال .. وانك شددت على الداخلية ما تضربش نار .. وانهم ضربوا نار من غير ما تكون عارف .. لانك ما كنتش بتتفرج الا على الفضائية المصرية .. ومفيش مانع تشتم في التليفزيون وتقول انه خدعك .. ده ها يخليهم يهبطوا شويه .. وطبعا تنكر تماما حكاية التوريث دي .
المخلوع	: ما اعلنلهم الحرب على اسرائيل احسن ؟ فيه ايه يا متر ؟!!! ايه اللي انت بتقوله ده .
الزوجة	: تعرفوا انا موش فارق معايا الحكم في حاجة .. احنا ممكن نشتري جزيرة ونشتري معاها شعب يشتغل فيها .. ومع ذلك .. بتمنى الشعب يتظاهر علشانا و جروب آسف يا ريس يكبر ويبقى ضعف جروب كلنا خالد سعيد .. ونرجع تاني العروبة علشان اغيظ اتنين بس .. المسلوعة مراة اوباما السودة الكودة .. والمتقشرة موزه .. انا موش عارفه الاتنين دول غدروا بينا ليه ؟ بيحبوا الشعوب اوي .. طب ما يكلموا اسرائيل تنسحب وترجع الارض للفلسطاينا لو متيمين قوي في حب الشعوب .
المحامي	: يا جماعة الوقت بيمر .
المخلوع	: ما تخليه يمر .. هوه وراك حاجة تانية اهم .
المحامي	: انا يا ريس مينفعش ابدا اخسر قضيتك .. سمعتي كلها بقت في القضية دي .
المخلوع	: خلي اعصابك جامدة يا متر .. تعرف انا لما انضرب على نار في اثيوبيا
المحامي	: عارف يا ريس والشعب كله عارف وحافظ كمان .
المخلوع	: حكاية  لف وارجع .
المحامي	: ايوه . بحكاية لف وارجع .
المخلوع	: طب احكيلك حكاية الضربة الجوية .
المحامي	: حافظها برده .. اللي فتحت باب الحرية .
المخلوع	: هيكل الــ .... بيلسن على الضربة الجوية .. عاملي فيها عم اللي عارف كل حاجة في العالم .. وقلب جريء ، وحياتك مشوارين تحقيق بس سكتوه وقطعوا لسانه .
الزوجة	: ده قلب اسود مشفتش في سوادة .
	( ينتبهون لطرقات بالباب )
المحامي	: ارتحتوا .. اهو التحقيق هايبدأ وما رتبناش الكلام اللي هانقوله
المخلوع	: اللي ذاكر ذاكر يا متر .. افتح الباب ومتنعاش هم .. ها يحصل ايه يعني
	( المحامي يفتح الباب فيدخل رجلان انيقان يصافحان المخلوع وزوجته بأدب جم  )
المحقق	: فخامة الرئيس .
مساعده	: تحياتي يا هانم .
المخلوع	: كويس انكم جيتوا .. اصل المحامي بتاعي خنقني .. رغاي قوي .. وياريته بيتكلم في مواضيع تفتح النفس .. المهم انتو اخباركم ايه يا ولاد .
المحقق	: احنا جايين في موضوع محرج يا ريس .
المخلوع	: ما تقلوش عاوزين قرشين سلف انا ما بسلفش حد ( يضحك )
المحقق	: لا .. سلف ايه ؟ احنا عاوزين نآخد اقوال فخامتك .. واحنا مستوعبين ان ده شيء صعب ، ومؤلم نفسيا .. شديد الألم .. لكن بالصلابة والصبر .. ممكن التحقيق يمر على خير .
المخلوع	: ده الموضوع المحرج الصعب . . ما ياما يا ابني برامج وصحافة واعلام خدوا اقوالي .. ايه الفرق ؟ علشان انتو نيابة يعني .. انتو فاكرين انها تفرق .. بعدين يا ولاد هاتفهموا انها ما تفرقش .
المحقق	: يعني نبدأ التحقيق يا ريس .
المخلوع	: يللا ابدأ .. هوه ايه يعني ؟ رحلة عبارة ( يضحك ) ابدأ ابدأ خلينا نتسلى ( يضحك )
المحقق	: ( لمساعده  ) اكتب ..
مساعده	: ( يفتح دفتره ويبدأ في الكتابة )
المحقق	: وقد انتقلنا نحن رئيس نيابة شرم الى حيث المستشفى التي يعالج فيها الـــــــــــمتهم لسؤاله عن ما هو منسوب اليه في قضية قتل المتظاهرين السلميين باطلاق الرصاص الحي عليهم مباشرة بصفته كان رئيس الجمهورية ورئيس هيئة الشرطة الأعلى .. جيم .. رايك ايه في الكلام ده يا ريس .
المخلوع	: العيال في التحرير والسويس واسكندرية ضربوا الداخلية .. حدفوهم بالطوب .. الداخلية ما ينفعش تسكت ، لازم يضربوا عليهم نار طبعا .. والمتظاهرين يستاهلوا ، اللي خرجهم من بيوتهم .. اللي موش عاوز يموت يفضل في بيته .
المحقق	: ( ملتفتا الى المحامي ) انا رايي اننا نروح اودة تانية نكمل فيها الاسئلة والأجوبة مع المتر بتاع سيادتك .. وموش ضروري نزعجك باجراءات روتينية يا ريس .
المخلوع	: اوي أوي .. اتفضلوا .
المحامي	: بعد اذتك يا ريس
المخلوع	: اوي اوي .
	( يخرج ثلاثتهم بينما تقترب الزوجه من زوجها ليتابعان التلفاز من جديد حيث يقوم المخلوع برفع الصوت باستخدام ريموت كنترول )
ص. مواطن	( عبر التلفاز ) احلى سنين عمرنا ضاعت بسببه .. اتذلينا واتبهدلينا واحنا  في الاساس شعب عظيم  .. حسبي الله ونعم الوكيل .
المخلوع وزوجته	( يضحكان )

ستار النهاية

حسام الغمري

24 /7 / 2011