لقاها في حضن راجل تاني

                                    لقاها في حضن راجل تاني    

(( مسرحية قصيرة ))

المنظر	حجرة نوم حديثة الطراز
	(( يُضاء المسرح حيث يدخل الزوج ليفاجأ بوجود رجل غريب يطارح زوجته الغرام بحيمية في فراش الزوجية ))
الزوج	: ( وقد تسمر مكانه لثوان قبل ان يبدأ في الكلام بنبره اشبه بالفحيح )
	بتخونيني .
الزوجة	: ( التي تنتفض في محاولة لستر نفسها وكذلك يفعل العشيق ) انت ايه اللي جابك دلوقتي .. موش معاد خروجك الساعة 3 ؟
الزوج	: خرجونا بدري علشان اعلان نتيجة انتخابات الرئاسة .
الزوجة	: ( بحنق ) آدي اللي بنآخده من السياسة وقرف السياسة .
الزوج	: بالعكس .. انا هفضل مديون للثورة انها كشفت لي حقايق كتير .
العشيق	: انا بقول استأذن أنا علشان شكلكم هتتناقشوا في مشاكل عائلية ميصحش احضر الكلام فيها .
الزوج	: بجد كلك ذوق .
العشيق	: عيب عليك ما تقولش كده ، هلبس هدومي انا في الريسيبشن وهقفل الباب ورايا ، وانتو براحتكوا ، اوك .
الزوج	: انت فعلا ذوق آخر حاجة  .
العشيق	: انت اللي جنتل على الآخر ، تؤمرنيش بحاجة .
الزوج	: ولع لي سيجارة أصل ولاعتي فضيت ونسيت اشتري وانا جاي  .
العشيق	: بس كده ( يخرج ولاعه من ملابسه ويعطيها له ) اتفضل .. خليها معاك .
الزوج	: ميصحش !!
العشيق	: والله ما هي راجعه .. الكلام بينكم شكله هيطول ، وانا نازل وهشتري واحدة من الكشك اللي الحارة الزخنيق اللي وراكم  .
الزوج	: كمان عارف الكشك اللي في الحارة الزخنيق اللي ورانا .
العشيق	: مهو انت ساعات كنت بتنزل شغلك متأخر ، وكنت بضطر اشرب ساقع في عصير لحد ما تجيلي رنه من المدام اطلع على طول .
الزوج	: ( يخرج نقودا من جيبه ) انا الحقيقة موش عارف اقولك ايه .. تآخد طيب حساب الساقع والعصير اللي اضطريت تشربه بسبب تأخيري .
العشيق	: يا راجل .. ده أنا لو خدت حساب الحاجات دي  موش هايبقى معاك فلوس تكمل بقيت الشهر .
الزوج	: بصراحة موش عارف اقولك ايه ؟ ( يعيد النقود الى جيبه ملتفتا الى زوجته ) الحقيقة عرفتي تنقي الراجل اللي تخونيني معاه .
الزوجة	: علشان تعرف بس .
العشيق	: استأذنكم انا بقى ، ( يغمز له باحدى عينيه ) عيش يا ابو الكباتن .
	( ينصرف العشيق وما هي الا ثوان ويسمع صوت غلق باب الشقة بينما يكون الزوج قد انتهى من اشعال سيجارته )
الزوجة	: برده ولعت السيجارة في أودة النوم وانا مليون مره اقولك ان الريحه بتمسك في الستاير وما بيجيليش نوم بسببها .
الزوج	: آسف .. آخر سيجاره .
الزوجة	: طيب ممكن أقوم البس ؟
الزوج	: ( وهو يسحب نفس عميق ) لأ .. خليكي كده .
الزوجة	: ( بنظرة ذات بريق ) ناوي تكمل معايا ؟!!
الزوج	: ( يسحب نفس آخر بعمق ) اي زوج بيعرف ان مرآته بتخونه بيبقى هايموت ويعرف منها اجابة على سؤالين ، الأولاني خنتيني ليه ؟ وأنا موش هسألك السؤال ده لان عندي اجابة مرضيه بالنسبة لي .
الزوجة	: ( بضجر ) وآيه هيه ؟
الزوج	: ان معندكيش مباديء تمنعك من الخيانة .
الزوجة	: ها نبدأ اهو في الغلط ، ومفكرتش ليه انك ممكن تكون السبب ، انك انت اللي خليتني اعمل كده .
الزوج	: مفيش زوجة خانت جوزها مفكرتش ان هوه السبب ، وان هوه اللي اضطرها تعمل كده ، وده بيبقى مبرر لنفسها علشان تستوي نفسيا وتقدر تكمل في الطريق اللي هيه مختاراه ، لان الخيانة بتوجع برده اللي بيخون علشان كده انا موش مهتم بالرأي ده ، وانت عارفاني طول عمري مبهتمش بسفاسف الأمور .
الزوجة	: ماشي يا ابو سفاسف .. والسؤال التاني ؟
الزوج	: السؤال التاني خنتيني مع مين ؟ ده برده موش السؤال اللي هسأله لاني شفت عشيقك بنفسي .
الزوجة	: وآيش ضمنك .. موش يمكن خنتك مع حد غيره ؟
الزوج	: واحد زي عشره ، العبره هنا في حدوث الفعل موش في تكراره .
الزوجة	: سفاسف برده ؟!!
الزوج	: ( ايماءة بالايجاب ) سفاسف .
الزوجة	: طب طالما موش هتسألني ولا هاتكمل معايا ، سبني بقى البس هدومي .
الزوج	: مين قال اني موش هسألك .. انا عندي سؤال مهم جدا وارجوكي محتاج اجابة .
الزوجة	: قول وخلصني .
الزوج	: يا ترى عملتيلي غدا وللا ملحقتيش .
الزوجة	: ( وقد اكتسى وجهها بحمرة خجل ) بصراحة ملحقتش أعمل أكل يا حبيبي ، وانت شفت بنفسك انا كنت مشغولة ازاي .
الزوج	: وكل مره مكنتش برجع الاقي غدا ، وكنت بتقوليلي عندك صداع .. كان بيبقى السبب الحقيقي انك ............
الزوجة	: ( ناظرة الى الأسفل ) آه .
الزوج	: ( بانفعال ) طيب انا بناشد العداله في شخصيتك اذا كان فيها ولو شوية كده يعملوا ربع كيلوا عدالة  ، هل من العدل اني ارجع من شغلي اللي هوه مصدر دخلنا مرهق وتعبان ومالاقيش اكل ، في الوقت اللي انت فيه بترضي شهواتك ونزواتك من غير اي تفكير او احساس بي  ؟
الزوجة	: ( ناظرة الى الاسفل ) بصراحة عندك حق ده موش عدل ، وانانية مني .. لكن اوعدك .. المرة الجاية هكون طبخالك من بالليل ، ويادوب على التسخين .
الزوج	: وعد ؟
الزوجة	: ( بحماس ) وعد ، قولي بقى ، البس وللا ........
الزوج	: انا بس عاوز افهم .. مادام الحل سهل كده .. ليه مفكرتيش فيه طول المده اللي فاتت دي ؟
الزوجة	: خلاص بقى آسفه .
الزوج	: موش مسألة أسف .. انا بس عاوز اوصل معاكي للسبب الحقيقي اللي خلاكي كل مره تخدعيني و تقوليلي جالك صداع ، وانزل اشتري لي وليكي كشري وشريط مسكن رغم اني بكون راجع من الشغل هلكان .
الزوجة	: معرفش .. كنت بقولك كده وخلاص .
الزوج	: بتقولي كده وخلاص وكنت متأكده اني هصدقك واتعاطف معاكي .. واقولك الف الف سلامة يا روح قلبي .. والحقيقة كان قلبي بيتوجع علشانك
الزوجة	: ( تخفض جزء من الملآءة التي تلتحف في محاولة لاغرائه ) خلاص بقى موش هعمل كده تاني .
الزوج	: والله العظيم انا مصدق انك موش هتعملي كده تاني .. بس كنت عاوز اعرف اذا كنت دايما متطمنه اني هصدق موضوع الصداع وعمري ما هشك فيه ؟
الزوجة	: ( التي تعيد الملاءه بعصبية ) انا عارفة انك على طول بتصدقني .
الزوج	: غبى انا ، موش كده ؟
الزوجة	: بالعكس ، انت ذكي جدا .
الزوج	: امال ليه كنت دايما بصدق كذبك ؟
الزوجة	: علشان انت طيب قوي .
الزوج	: الطيبه لا تعطل الذكاء .. موش مقتنع باجابتك .
الزوجة	: علشان بتحبني بجد ، انت فعلا بتحبني حب كبير .. وقبل ما تفكر انا صادقة وللا بخدعك كنت بصعب قوي عليك وانا بقولك اني تعبانه وراسي هتنفجر ، الحقني بشرط مسكن .
الزوج	: وده اللي خلاكي تستسهلي خداعي ، واتاريكي كنت دايما تآخدي شاور بعد الكشري .. وانا أقول في بالي بتهدي الضغط اللي في الشرايين .. اتاريكي بتهدي حاجة تانية !!!
الزوجة	: ( بحده ) بس .
الزوج	: ( وهو يقترب منها ) من يومين لما كنت معاكي في السرير قلتيلي انك انبسطتي قوي .. كان حقيقي وللا كانت مجامله ؟
الزوجة	: حقيقي وربنا .. اسمعني يا حبيبي ، انا عارفه انك زعلان .. بس انا بكون لوحدي طول النهار وانت في الشغل ، كمان باليل بتنام بدري علشان تعرف تصحى بدري فبكون لوحدي طول الليل برده .. بس انا اوعدك اني فعلا معملش كده تاني .. واني عمري ما هنسى شياكتك دي ابدا ، بس انت متكشش في تاني زي كده يوم ما زعقتلي علشان انتخبت شفيق .
الزوج	: ( الذي يضع يديه على رقبتها ويبدأ في خنقها ) شوفي يا حياتي مينفعش علشان انا طيب وحنين معاكي .. وبثق فيكي علشان بحبك حب كبير.. وبصدقك علشان بتصعبي علي ، تقومي تأكليني كشري 18 يوم في الشهر .. والباقي طبعا اجزاتي جمعة وسبت والدورة الشهرية بتاعتك .
الزوجة	: انت مجنون .. بتقتلني علشان الأكل ؟
الزوج	: عُمر الأكل ما فرق معايا وانت عارفة .
الزوجة	: ( وهي تختنق ) امال بتموتني ليه ؟
الزوج	: علشان تراثنا الشرقي يا حياتي .. نهاية الخيانة لازم تكون الموت .. والموت يا عضوي يا فسلفي بنسيانك .. وحظك بقى اني مختار الموت العضوي ، اتشاهدي يا حياتي .
الزوجة	: اديني فرصة تانــــــ   ( تلفظ النفس الأخير وتموت )
الزوج	: ( وهو يتأمل جثتها ببرود ) للاسف ، فيه حاجات مفهاش فرصة تانية .. زي نهائي كاس العالم مثلا .. يا تكسب يا تخسر .
	( يخرج الموبيل ويتصل ) ألو ... بوليس النجده ....

اظلام تدريجي

حسام الغمري