ايام الحب والثورة / ستاند أب كوميدي

:  ( برومانسية ) حبيتها أكتر من أي حاجة في حياتي .. أكتر من عربية كوبيه بجنوط اسبورت .. اكتر من آخر البومين لعمرو دياب .. أكتر حتى من ماتشات الأهلي .. لكن ... محبتهاش أكتر من مصر ، بلدي .. بلد النادي الأهلي .. بلد عمرو دياب .. بلد البنوك اللي بتسهل اقساط العربيات الكوبيه المتجنطه .. علشان كده لما قريت الدعوة  اللي بدأت في جروب كلنا خالد سعيد ، قررت بدون تردد اني انزل الشارع واغير .. الوضع بقى ما يتسكتش عليه .. فساد ، وتعذيب ، ورجال اعمال بتلهف مليارات من البنوك .. وده طبعا ممكن يأثر على تقسيط العربيات الكوبية المتجنطه .. حبيبتي قالت لي : مفيش نزول .. مبارك ده صاحب الضربة الجوية ودي فتحت باب الحرية .. قلت لها : احنا بقالنا 30 سنة عاملين واجب طناش مع الريس اكراما للضربة الجوية .. ولو فضلنا ساكتين اكتر من كده يبقى ضرب على القفا يا حبيبتي .. قالت لي : برده مفيش نزول .. وبعدين لو الريس مشي مين هاييجي مكانه ، البرادعي ..  اسمه بلدي قوى ..  قلتلها يعني : مبارك هو اللي استايل .. ده انا كل ما اسمع مذيع بيقول مبارك بقول في سري الله يبارك فيك .. قالت لي : مبارك أهون من البرادعي .. قلت لها : يا حبيبتي هو احنا وصلنا للدرجة اللي نختار الريس فيها باسمه .. دي تبقى مصيبة .. الصعايدة ساعتها هايصوتوا لأي واحد اسمه هريدي حتى لو موش مُرشح .. والبورسعيدية اصواتهم طبعا مضمونه لأبو العربي .. والشباب مُرشحهم معرف تامر م الآخر .. والمسيحيين ها يصوتوا لبشوى .. بس من اللحظة دي اقدر اقولك ان رئيس جمهورية مصر القادم هايكون اسمه ابو اتريكة  .. علشان الاهلي هو الأغلبية ، تخيلي رئيس مصر العربية قاعد بهيبته في مؤتمر القمة العربية يدينا ضهره نلاقي البدلة مكتوب عليها 22 ، مينفعش طبعا يا حبيبتي .. قالت لي : يبقى ما تنزلش المظاهره .. والحل ان مبارك يفضل موجود .. ولو نزلت المظاهره يبقى كل اللي بينا انتهى .. والكام دبدوب اللي جبتهوملي هاعذبهملك .. قلت لها : هاتعملي ايه في الدباديب يا مجنونه .. قالت لي : هاسيبهم في البانيو لحد ما يغرقوا .. .. وحطتني في اصعب اختيار .. مبادئي وافكاري الثورية في كفه .. ودباديبي في البانيو .. .. لكن بسرعة حسمت امري .. لو كان قدر الدباديب انهم يتعذبوا في البانيو فلازم يواجهوه بشجاعة .. زي ما انا هاواجه الأمن المركزي بنفس التصميم والشجاعة .. ونزلت .. ولقيت ظابط ووراه مجموعة عساكر أمن مركزي .. عيني جت في عين الظابط حسيت فيهم بنظره فهمتها كويس .. لاني عارفها .. اكيد هوه كمان عنده مشكله مع حبيبته .. يمكن مديها معاد ومستني المُظاهره تخلص علشان يقابلها .. يمكن النهاردة كان هايآخد الست والدته علشان يفاتحوا أهلها .. أو يمكن جت له رنه جديده وكان عاوز يغيظها بيها قبل ما يبعتهالها بلوتوث .. .. وبدأ الضرب .. هتفنا سلمية.. ضربونا اكتر .. أكدنا في الهتاف سلمية سلمية .. اكدوا الضرب أكتر وأكتر .. روحت للظابط وسألته : يا كابتن هيه كلمة سلمية دي بتغيظكم  .. وفجأة .. خدت ضربه على دماغي .. دخت .. وعيني زغللت .. وفجأة شفت طيف حبيبتي بيقرب وكانت لابسه فستان ابيض .. وسكرف أسود .. وهي كده كده ضاربه شعرها لون أحمر .. م الآخر عامله استايل علم مصر هايل .. ساعتها ،  قلت انا خلاص .. دخلت على فيلم brave heart .. وبودع الدنيا الحزينة .. فصرخت بأعلى صوتي وانا بنزل على الأرض freedooooom .. لقيت ايد حبيبتي بتسندني وبتقولي .. قولها بالعربي ليفتكروا عندك آجندة .. استغربت .. بس قلت يمكن تخاريف أموات .. وصرخت تاني freedoooom  .. قالت لي هوه انت مفيش فايده فيك .. لازم تعاندي وخلاص .. طب والله لو مقولتهاش بالعربي لأعذب لك دباديبك وابيتهمولك في البانيو .. كان نفسي اقولها انت بتتنكي على ايه .. كلها دقيقتين وروحي تطلع وانا شهيد .. واعيش حياتي مع الحور العين .. لكن فضلت احتفظ بالفكره دي لنفسي .. خفت اضيع ثواب الشهادة .. ودخلت في عتمه شديدة عمري ما شفتش زيها .. قلت يبقى ده البرزخ .. وبعد منه هاخش على الجنه .. وافتح عيني على الحور العين على طول .. كان نفسي ادخل على الحور بدباديب ..   لكن يللا .. أكيد هيقدروا ظروفي .. وفعلا .. بعد فتره من العتمه فتحت عيني لقيت لقيت شاب زي القمر بيقولي حمد الله على السلامه يا بطل ، قلت له : شهيد برده قالي دكتور ، دكتور شهيد قالي : لأ دكتور جراحه بدقق لقيت حبيبتي واقفه وراه .. بصيت بسرعه الناحيه الناحيه التانية أدور على الحور العين .. لقيت جرحى ومصابين .. بصيت تاني ناحية خطيبتي وسألت ، أنا فين .. الدكتور قالي .. احنا عملنا مستشفي ميداني بالجهود الذاتية وانت دلوقتي تمام والحمد لله .. وعلى فكرة خطيبتك بتحبك قوي .. كانت طول الليل جنبك وعنيها ما بطلتش دموع .. خطيبتي قربت مني ، ومسكت ايدي وقالت لي .. مبروك يا حبيبي .. مصر رجعت لنا .. قلتلها طب والدباديب .. قالت لي .. هايفضلوا موجودين معززين مكرمين لحد ما ولادنا انشاء الله ما يلعبوا بيهم .. ( بدهشه ) ولادنا .. اوعي تكوني اتشاقيتي وانا في الغيبوبه .. قالت لي لأ .. بس اكيد بعد الظلم والفساد ما ينتهوا .. الشباب هايقدر يشتغل ويسكن ويتجوز .. واللي بيتجوز بيخلف .. سكت بعد ما فهمت اني مضطر اصبر كمان كام سنه لحد ما اشوف الحور العين .. ومادامت حبيبتي رجعت اجباري .. فمن الذكاء اني اصلح اوضاعي معاها .. خصوصا وانها شاركت في الثورة بعد ما راجعت نفسها .. وفهمت ان الرئيس موش باسمه .. ولا بشكله .. ولا بطريقه كلامه .. لكن ببرنامجه .. وفتحت مع خطيبتي حوار ديمقراطي حول مستقبل الدباديب .. والعربية اللي ناوي اشتريها بالقسط .. وفي النهاية ، قدرت اتفهمم انها تفضل زي ما هي .. بتشجع الزمالك .. مع اني التراس اهلاوي