الحرافيش / عن رواية نجيب محفوظ / الجزء الرابع

اللوحة الثامنة

المنظر	البوظة مجموعة من المناضد يجلس علي أبرزها الفتوه قنصوه والسمانى وأفراد عصابتهم  كما يجلس الأعيان والتجار بينما يجلس علي أرضية البوظة الحرافيش , والجميع في حالة سكر يغنون ويرقصون بينما تقوم فله بتقديم البوظة بطريقة شبه استعراضية وتلاحظ نظرات متبادلة بينها وبين حسب الله .
الحرافيش	: ( غناء ) يا بوظة يا أمو شفايف سكر أحلي من الشهد وم العنبر خشي علي بشوق وحنان ما كفاية هجر كفاية حرمان والطشي مخي كمان وكمان خليني أرجع بيتي متخدر يا بوظة يا أمو شفايف سكر يا بوظة طول اليوم شقيان ومرآتي أشوفها أبات زعلان دا عليها بوز يقضي ميدان ولسانها مبرد سنه مشرشر يا بوظة يا أمو شفايف سكر
قنصوه	: ( الذي يقف وقد لعبت الخمر برأسه ) .. سمع هس يا جربوع انت وهوه .. اليكم البيان التالي .. قررنا نحن المعلم قنصوه فتوة حارتكم تخفيض الإتاوة المفروضة علي زباين البوظة .. مقدار التخفيض نكله بحالها وانشالله ما فتوة حوش .
الحرافيش	: تحيي البوظة .. تحيي البوظة .
قنصوه	: وقررنا منع ضرب الحرافيش بالكرباج واستخدام البرطوشة بلا منه في حالة الطوارئ .
الحرافيش	: تحيي البوظة .. تحيي البوظة .
قنصوه	: كما قررنا السماح لصاحب البوظة باحتكار هذا الكار في الحارة تحت سمعنا وبصرنا وحمايتنا .
عاشور	: ( الذي يدخل البوظة فيفزع دخوله الجميع لاسيما حسب الله ورزق الله ) ويا تري مين الشيطان اللي فتح الوكر ده في حارتنا يا فتوة الحارة ..  ( يبدوا الخوف علي وجه الفتوة الذي يحاول الخروج من حالة السكر )
درويش	: ( الذي يدخل من الجهة الأخرى ) أنا يا عاشور .. درويش .. انت نسيتني وللا إيه ؟
عاشور	: ( بذهول ) إخص عليك .. يا أخي أعمل احترام لذكري أخوك الصالح الشيخ زيدان .
درويش	: أخويا مات يا عاشور .. والحي أبقي من الميت .
عاشور	: هوه السجن معلمكش حاجة .. الدنيا معلمتكش حاجة .. لسه ما عرفتش إنها منفاتة وموش ها يبقي للبني آدم غير الآخرة .
درويش	: ومين قالك إني ما بعملش لأخرتي .. بت يا فله .
فله	: ( التي تقترب في انكسار ) تحت أمرك يا معلم درويش .
درويش	: شايف البت الغلبانة دي .. لقيطة .. فتحت عنيها علي الدنيا ملقيتلهاش أب ولا أم .. وكانت بتآكل خرج البيوت زي الكلاب والقطط .. خدتها وآويتها علشان أكسب فيها ثواب .. اعتبرتها يتيمه .. هيه موش كفالة يتيم أحسن من كلام كتير عن الخير من غير فعل  يا سي عاشور .
عاشور	: انت لو عاوز تكسب فيها ثواب يا درويش ماكنتش شغلتها في مكان زي ده .
درويش	: وفيها إيه ؟.. أنا خليتها تشوف نصيبها .. وأهي الشغلانة دي جابتلها عريس مأصل طلب إيديها مني .. عارف العريس ده يطلع مين يا سي عاشور .. حسب الله ابنك الكبير .
عاشور	: ( بنبرة أسد ) واد يا حسب الله .. تعالي هنا وأقف قدامي .
حسب الله	: ( يذهب اليه متمنيا انشقاق الأرض وابتلاعه ) حاضر يابا .
عاشور	: ( يصفعه بقوة تهز أرجاء المكان وتنشر الصمت فيهوي حسب الله علي الأرض ) علشان تبقي تفتح للشيطان باب بعد كده .
السمانى	: ( هامسا لقنصوه ) لازم تتكلم دلوقتي يا معلمي وإلا هيبتك هاتضيع في الحارة .
قنصوه	: ( الذي لم يجد بد من التدخل ) جري إيه يا عاشور .. انت موش عامل حساب للفتوة قنصوه وللا إيه ؟
عاشور	: الفتوه اللي ما يحميش أخلاق حارتنا ما يتعملوش حساب يا قنصوه .. انت ازاي تسمح للشيطان يبني عش في حارتنا .. وللا انت بقيت زبون من زباينه .. ( للحرافيش ) وانتم .. ازاي تنسوا ماضيكم .. إزاي تسيبوا الجوامع فاضية في صلاة الفجر وانتم هنا سكارى ..  بتنسوا همومكم هنا وللا بتنسوا خوفكم وضعفكم .. صدقوني يا أهل الحارة .. البلا بينزل علي الأرض لما بتزيد الذنوب .. وكفاية الخوف عليكم أكبر ذنوبكم .. حاربوه يا أهل الحارة وإلا استنوا الطاعون اللي وعد بيه المولي كل ظالم خسيس .. ظلم غيره وفي الأساس كان بيظلم نفسه
قنصوه	: يظهر كرمي معاك طمعك في يا عاشور.. وجه الوقت اللي تفوق وتعرف حدودك .. أنا أصغر صبي من صبياني يقدر يفشفش عضمك بنبوته .
عاشور	: جرب يا قنصوه .. علشان تدوق بنفسك قوة الحق .
قنصوه	: يعني موش خايف يا عاشور .
عاشور	: قلتها من سنين لأهل حارتنا .. الخوف قواد والشرف طول عمره غالي .
قنصوه	: واد يا برعي .. خش عليه يا واد وعرفه مقامه . ( أحد أفراد العصابة يقترب من عاشور ويرفع نبوته في الهواء ويهم بضرب عاشور ضربه معجزه ولكن عاشور يمسك النبوت قبل أن يسقط علي رأسه ويجذبه نحوه بقوه بعد مقاومة غير عنيفة من برعي الذي يندفع متأثرا بقوة شد عاشور للنبوت فترتطم رأسه بمنضده فيسقط مغشيا عليه )
السماني	: سبهولي يا معلمي .. أنا من زمان نفسي أربي الواد ده وأعرفه مقامه .
قنصوه	: الواد بتاعك يا سماني .. وحلال عليك دمه .
السماني	: ( الذي أصبح وجهها لوجه أمام عاشور وكلاهما يحمل نبوتا وفي وضع صراع ) مسكة النبوت دي للرجالة اللي قلبها ميت يا عاشور .. وانت جبان .. والجبن في دمك .. عارف ليه .. لإنك مرضعتش من أمك .. علشان رمتك وانت لسه مانضفتش من دم الولادة .. عارفين ليه أمه رمته يا أهل الحارة .. ( يباغته بضربه بنبوته يصدها عاشور برشاقة وتبدأ مبارزه حامية الوطيس يبرز مهارة عاشور في استعمال النبوت وثوان قليلة تستغرقها المبارزة قبل أن يسقط السماني مغشيا عليه إثر ضربه من النبوت الذي يحمله عاشور )
عاشور	: ودلوقتي جه دورك يا قنصوه .
حرفوش 1	: اللي هايكسب ها يبقي الفتوه .
حرفوش 2	: ياما اتمنيناها يا عاشور .
حرفوش 3	: لو عاشور بقي الفتوه ها يهد البوظة .
حرفوش 4	: تغور البوظة ويحيي العدل .. هوه إحنا بنشرب إلا من غلبنا .
حرفوش 5	: طب لو كسب الفتوه .
حرفوش 6	: هاتفضل البوظة , و حياتنا ها تبقي نار في الدنيا ونار في الآخرة .
قنصوه	: ( في وضع صراع متردد مع عاشور لمدة ثوان قبل أن يلق نبوته علي الأرض ويصافح عاشور ) ونعم الفتونة .. يا أهل الحارة .. حد مشكك في فتونة عاشور .
الحرافيش	: حيوه .. حيوه .. اسم الله عليه .. اسم الله عليه .. ده فتوه بقوه .. اسم الله عليه .. اسم الله عليه ..
عاشور	: ( يخرج قنصوه وخلفه درويش الذي يفر هاربا ) خلاص بقيت فتوكم , لكن يعلم الله إن الفتونة حمل عمري ما إتمنيته ولا سعيت إليه .. لكن حكمت ربنا وخوفي علي عيالي لبسوني توب ماكنتش رايده .. لكن إرادة ربنا مفيش منها مهرب .
حرفوش 1	: انت تستاهل كل خير يا عاشور .. وربنا اختارك فتوة من يوم ما كنت بذرة في بطن الست أمك .
حرفوش 2	: انت اتخلقت علشان تبقي الفتوة يا عاشور .. والمولي ليه في خلقة شئون .
عاشور	: أعوذ بالله منكم لو رفعتوني لمكانه ما استحقهاش بعملي .. يا ناس اتقوا الله .. هو انتم لسه شوفتم سيرتي فيكم هاتكون فيكم إزاي .. موش يمكن أظلم .. موش يمكن الفتونه تغرني وطعم الإتاوة يحلي في بقي .
حرفوش 4	: انت ابن حلال يا عاشور وعمرك ما هاتظلم الحرافيش .
حرفوش 5	: ابن الأصول ما تغروش الدنيا بمظاهرها .
حرفوش 6	: وإحنا عارفين إنك ابن أصول .
عاشور	: من دقايق السماني عاب في أصلي مادافعتوش  .. ودلوقتي خلاص متأكدين إني إبن أصول .. انتم أشر علي من نفسي .. وبسببكم طول عمري زاهد في الفتونة .. لكن مادمت خلاص بقيت فتوه .. لازم أكون قد الحمل .. والله المستعان عما تصفون .

إظـــــلام

اللوحة التاسعة

المنظر	الحارة يضاء المسرح ودرويش والسماني وبعض التجار وبعض أفراد عصابة قنصوه يجلسون علي المقهى في ليل متآمر
درويش	: هاتصبروا لحد امتي يا رجاله .. السنين بتفوت وحالكم في النازل يوم ورا يوم .. هيبيتكم راحت , والحرافيش بقوا سيادكم , بيشتروا منكم بالسعر اللي هما عاوزينه .. وبيشتغلوا حداكم باليومية اللي بيحددوها .. فاضلكم إيه تبكوا عليه .
تاجر 1	: ليهم حق يعملوا فينا أكتر من كده .. مادامت الإتاوة ما بتتفرضش غير علينا إحنا التجار .
تاجر 2	: إحنا اللي طول عمرنا كبارات الحارة وأعيانها .
تاجر 3	: والأدهي من كده كلمتهم إلي بقت دستور عند سي عاشور .. عاوزين حوض تشرب منه البهايم .. يلم من التجار .. عاوزين سلسبيل يروي العطشان يلم من التجار .. عاوزين نوسع الزاوية اللي بنصلي فيها .. يلم من التجار .
تاجر 4	: ياريت علي قد كده وبس .. ده مفيش حد فينا فكر يزوره ويهاديه بهدية إلا وردة مطاطي راسه وفي إيده هديته .. وكاننا جرابيع ما يشرفوش إننا نهاديه .
السماني	وانتم يا رجالة عصابته عاجبكم اللي بيعمله معاكم .
برعي	: إزاي بس نعجب بأفعاله وهوه محرم علينا الإتاوة .. وعمرنا طولنا منها مليم أحمر .
قدري	: بيشغلنا زي الحرافيش .. شوية حمالين .. وشويه عربجيه .. وشويه بنايين .
نظمي	: وكل ما نكلمه .. يقولنا زي زيكم .. أنا مبخدش مليم لنفسي من الإتاوة .. وبآكل من عرق جبيني .
درويش	: طيب هاتفضلوا ساكتين لحد امتي .. هاتصبروا علي عاشور لحد امتي .. ده ولاده الكبار ماستحملهوش وطفشوا منه .. وما فاضلش معاه غير إبنه الضعفان شمس .. اللي مقق عينه في القرايه .. ومعرفش يتعلمله صنعه تنفعه .
برعي	: و نعمل إيه بس يا درويش والسنين بتزود عاشور قوة فوق قوته .
درويش	: موش ها نخلص منه غير بالحيلة .
نظمي	: قصدك نقتله .
السماني	: وفيها إيه ؟ الموت نال من اللي أشد منه .
قدري	: بس الحرافيش بتحبه .. ولو غدرنا بيه ممكن يولعوا فينا .
تاجر 1	: هما مين دول اللي ها يولعوا فينا .
قدري	: الحرافيش .
تاجر 2	: الحرافيش شموا نفسهم لما لقوا كلب يتحاموا فيه .. ولما يموت الكلب .. الفيران هاترجع الجحور .
نظمي	: بس دول اتعودوا علي الكلام .
تاجر 3	: نعلمهم إحنا إزاي يستكوا من جديد .
السماني	: هيه .. قلتوا إيه يا رجاله .
درويش	: معانا وللا علينا .. ( يصمت جميع أفراد العصابة )
تاجر 1	: لو كنتم معانا , العز ها يعرف طريقكم من تاني .. ولو فضلتم مع عاشور .. قولوا علي النعمة يا رحمن يا رحيم .. قلتوا إيه .. معانا وللا مع النعمة .
الجميع	: ( بعد لحظة صمت ) مع النعمة .

إظـــــلام