مونتج / الجزء الثالث
اللوحة السابعة
( الإضاءة أمام كابينة المونتاج )
| آمال | : أحمد ما ماتش . |
| أحمد | : بس قتل . |
| آمال | المهم إنه ما ماتش . |
| أحمد | : مستقبله ضاع .. عبد الحكيم غلط .. القتل موش وسيله .. العنف بأي شكل موش وسيله . |
| آمال | : المسألة من وجهة نظري رمزية .. دور على الرمز إللى عبد الحكيم عايز يوصلنا ليه.. مستحيل يكون عبد الحكيم يقصد القتل بالمعنى المعروف .. وبالأسلوب ده يبقى موت علي فى كل المشاهد إللى فاتت مهواش موت بالمعنى المعروف .. مهواش موت واقعي .. المشكلة إن المشاهد فى الشريط مش مترتبه وإحنا مامعناش إسكريبت .. لكن أنا موش عارفه ليه حاسة بأمل . |
| أحمد | : أمل فيه إيه ؟ |
| آمال | : أمل فى كل حاجه .. أمل فى الحياة . |
| أحمد | : انتى بتبالغى .. المشهد إللى فات من أبشع مشاهد الفيلم .. وأنا واثق إن الرقابة ها تحذفه . |
| آمال | : مين قال .. اسمع تعالى نشوف المشهد إللى بعد كده فى الشريط . |
- تنتقل الإضاءة إلى منطقة التمثيل
| ص. الكلاك | مشهد واحد أول مره . |
- علي ونورا وسط مجموعه من الراقصين فى أغنيه حب دويتو
- بعد انتهاء الأغنية فكس كادر
إظلام
صوت تحريك الشريط
اللوحة الثامــنة
( الإضاءة تنقل إلى أمام كابينة المونتاج )
| أحمد | : الكلاك إللى فات معناه إن الغنوه إللى فاتت أول مشهد فى الفيلم . |
| أمال | : غنوة الحب . |
| أحمد | : الدويتو . |
| آمال | : مهو الحب ما يحلاش غير دويتو .. الحياة ما تحلاش غير دويتو . |
| أحمد | : و الغريبة إن أحمد ما قتلش ولا اتقتل . |
| آمال | : علشان كان بيحب . |
| أحمد | : قد كده الأغنية أثرت فيكى . |
| آمال | : من زمان يا أحمد . |
| أحمد | : ( محاولا الهروب ) بس أنا كده احترت مع عبد الحكيم .. بعد ما كنت خلاص حسيت بالفكرة و قربت منها .. أحمد بيموت فى كل مشهد .. كان رمز ليه معنى .. و فجأة يتحول أحمد لقاتل فى مشهد فج .. بقولك إيه يا آمال .. جرى الشريط خلينا نشوف آخر مشهد فيه . |
| آمال | : أنت مستعجل على إيه .. خلينا ماشيين بنفس الترتيب الموجود على الشريط . |
| أحمد | : علشان خاطري خلينا نحاول نفهم عبد الحكيم عاوز يقول إيه فى الآخر .. لو سمحتى يا آمال ورينى آخر مشهد . |
- آمال تضغط على زر التقديم . - صوت تقديم الشريط . - يسمع آخر كوبليه من الأغنية .
| آمال | : نفس الغنوه . |
| أحمد | : أكيد كل ده ليه معنى . |
| آمال | : بادىء بالحب و ناهي بيه . |
| أحمد | : مفيش فايدة .. لا يمكن ها نفهم من غير الإسكريبت . |
| آمال | : أنا عندي فكرة . |
| أحمد | : فكرة إيه . |
| آمال | : أتفرج معايا على الجزء اللي جاي ده كله . |
إظلام
صوت تحريك الشريط
اللوحة التاســـعة
( أللقطات ألتاليه تتم فى تتابع سريع ودون تعليق )
- داخل الحرم الجامعي
| علي | : ( بنبره حماسية لاجتماع الطلبة داخل الجامعة ) يا إخوان .. إحنا هدفنا إننا نسجل قدام العالم كله اعتراضنا على الممارسات إللى بتحصل فى فلسطين وفى العراق .. معترضين على خطط تفتيت دول المنطقة واللى بيسموها بلقنـة الشرق الأوسط . |
| خالد | : ( بحماس ) إحنا معندناش أي مشاكل مع النظام .. لكن هدفنا توصيل رسالة .. والرسالة دي باختصار هيه إننا على استعداد تام لمواجهة الموت علشان عروبتنا .. علشان قيمنا ومبادئنا . |
| علي | : الموت أشرف لنا من الإكتئاب إللى بتسببهولنا المشاهد إللى بنشوفها فى قنوات الأخبار لأخواتنا فى فلسطين ألمحتله .. والعراق . |
| ر . الجامعة | : وأنا بصفتي رئيس الجامعة .. بدعوكم إلى إصدار بيان موحد و ها وقع عليه أنا بنفسي و هآخلى كل الأساتذة تشاركني فى التوقيع عليه , و صدقوني , أنا واثق إن مفيش أستاذ مصري ممكن يرفض التوقيع على بيان بالشكل ده .. وكمان ها نترجمه بكل اللغات .. وها نوصل صوتنا للعالم كله . |
- تصفيق شديد من ألطلبه
إظلام سريع جدا
اللوحة العاشرة
- كورنيش النيل
( علي و نورا و نفس تفاصيل اللوحة الثالثة )
| علي | : ظروفي متنيله .. و لسه بآخد مصروف من أهلي .. وموش لاقى شغل .. بس بحبك .. وموش مستعد أتنازل عنك مهما حصل طول ما أنت مستعدة تكملي معايا . |
| نورا | : علي أنا فخوره بيك .. وربنا يا حبيبي ما بينساش حد .. حاول يا علي .. حاول تانى و تالت . |
| علي | : ورابع وخامس وعاشر .. أنا موش ورايا غير هدف واحد .. هو أنتى .. الدنيا إيه غير بيت صغير هادىء فيه أحلى عيون هيه عيونك . |
| نورا | : هتيأس يا علي . |
| علي | : عمري ما ها يأس .. والأمل ها ستمدة من حبك .. و بالابتسامة نواجه أصعب المشاكل . |
| نورا | : ها تتردد . |
| علي | : مستحيل . |
| نورا | : ها تخاف من بكره . |
| علي | : بكره ده فى علم الغيب . |
| نورا | : ولو زادت المشاكل . |
| علي | : ها حس بطعم البطولة . |
| نورا | : و لو اتعقربت أكتر . |
| علي | : أنا وراها والزمن طويل . |
| نورا | : وأنا بحبك . |
إظلام سريع
اللوحة الحادية عشر
- القهوة
- علي يجلس مع والده والحاج محمود ونفس تفاصيل اللوحة الرابعة
| علي | : أنا جاى علشان عايز منك طلب يا والدى . |
| أبو علي | : ( الذي يغلق الطاولة ) بعد إذنك يا حاج محمود . |
| الحاج محمود | : لا أبدا يا أبو علي .. أنت عارف إن أحمد فى معزة أبنى عمرو . |
| أبو علي | : ( يتقدم به بضعة خطوات ) .. عايز إيه يا علوه . |
| علي | : أنا عايز أتجوز .. أنا بحب إنسانه كويسه جدا . |
| أبوعلي | : صدقني الخبر ده يفرحني .. لكن أنت شايف نفسك مستعد للخطوة دي دلوقتى . |
| علي | : لأ طبعا أنا موش مستعد .. وموش ممكن أحرج حضرتك أو أحرج نفسى .. لكن أنا بفكر فى مشروع صغير .. مشروع بيعتمد على الفكرة أكتر من رأس المال .. و عايز مشورة حضرتك .. ومساعده مالية صغيره . |
| أبو علي | : ( يبتسم ويربت على كتفه ) ( تبدأ المشاجرة مع أبو العربى) |
| فرد 6 | : أنت نصاب ( يفتح عليه مطواة ) . |
| علي | : بعد إذنك يا بابا . |
| أبو علي | : رايح فين . |
| علي | : ها حل المشكلة.. دول شباب من سني .. ها عرف أتفاهم معاهم ( يتجه إليهم ) |
| | يا كابتن .. فتح المطوة ده ممكن يضيع مستقبلك . |
| فرد 6 | : بس ده نصاب .. أنا لازم أعلم وشه . |
| علي | O.K: علم وشه وخلى الداخلية تعلم على الملف بتاعك .. استخدم مخك .. عشره أو عشرين أو حتى مليون جنيه .. ما يسووش يوم واحد تقضيه فى السجن .. صدقني .. أنا شاب زيك و عايز مصلحتك |
| أبو علي | أنا يظهر عرفت أخلف . |
إظلام سريع
اللوحة الثانية عشر
- أحمد يقف أمام شاهد قبر والده نفس المنظر فى اللوحة الخامسة
| علي | : المشروع نجح يا والدى .. و دلوقتى بقيت بكسب بالحلال فلوس كتير .. بابا أنا كان نفسى تكون معايا الليلادى .. ليلة فرحى .. لكن أتطمن .. كل شيء إنشاء الله ها يتم زى ما بتمني .. وكأنك موجود بالظبط .. بابا أنا فخور بيك, لولا اشتراكك فى حرب أكتوبر .. ولولا مساعدتك لى فى مشروعي .. ما كانش بقى ده حالي دلوقتى . |
| فرد 1 | : ( بأسلوب البلطجية ) تعيش وتفتكر يا جنتيل . |
| علي | : أنتو مين ؟ |
| فرد 1 | : إحنا القضا . |
| فرد 2 | : المستعجل . |
| علي | : لو عايزين فلوس خدوها بعد ما تموتونى .. أنا ما بسبش حقى لحد . |
| فرد 1 | : باين عليه مستبيع . |
| علي | : اسمعوا يا شباب انتوا لو عشره موش ها تطلعوا مليم من جيبى .. ولو عايزينها خناق نتخانق ..وأنا كفاءه بيكم وبألف زيكم .. عارفين ليه ؟ علشان أنا جسمي حر .. لكن أنتم .. المخدرات جابت أجلكم وعجزتكم قبل الأوان . |
| فرد 2 | : وعرفت منين إن إحنا ضربين . |
| علي | : باين على مناظركم .. على وشوشكم .. على طريقة كلامكم .. يا خسارة انتم صعبانين علي . |
| فرد 1 | : صعبانين عليك !! دا إحنا بنفكر نموتك ونسرقك . |
| علي | : صدقني ولا تعرفوا تعملوا معايا حاجه لأني صاحب حق.. والحق ما بيضيعش يا رجالة .. اسمع يا كابتن .. إحنا شباب زى بعض .. وأنا عندى مشروع صغير و عايز عمال .. أنا ممكن أساعدكم بس بشرط . |
| فرد 2 | : ( بتردد ) شرط إيه ؟ |
| علي | : تساعدوا نفسكم الأول .. قلتوا إيه ؟ |
إظلام سريع
اللوحة الثالثة عشر
- علي يضع يده على أبو عبد الله وباليد الأخرى يرفع زجاجة الخمر ونفس تفاصيل اللوحة السادسة
| علي | : اسمعنى كويس .. أنا ممكن أقتلك بالإزازه دي .. لكن أنت بالفعل ميت .. فلوسك دى كنت ممكن تستغلها فى حاجات عظيمة .. لكن أنت زى الحيوان .. جريت ورا شهواتك .. أما انتى يا هانم ( ملتفتا إلى نورا ) .. فالبلطجية بتوعك دول موش ها يخوفونى . |
| أبو عبد الله | : اتركيه .. اتركيه يرحل يا نورا .. اتركيه . |
| نورا | : هو إللى خسران . |
| أحمد | : لكل عالم هفوة .. و انتى الهفوة بتاعتى .. والحمد لله .. ربنا نجانى منها . |
إظـــــلام
اللوحة الرابعة عشر
( الإضاءة مركزه أمام كابينة المونتاج )
| أحمد | : لأ .. دي مباشرة وسطحية . |
| آمال | : هيه دي الطريقة اللي حب يوصل بيها كلمته .. و بعدين هوه مخبي فكرته الأساسية .. ولو فكرت شوية ها توصل لها .. عبد الحكيم ببساطه شديدة وسخرية حطنا قدام المشكلة .. وشاور لنا على الحل , وسابنا نختار .. رغم إنه كان ممكن يكتفي بطرح الأسئلة و يسيبنا إحنا نفكر فى الحل . |
| أحمد | : عشر سنين تأمل .. كان لازم يخرج منهم بحاجه . |
| آمال | : عقبالك . |
| أحمد | : علي فى كل مره كان بيواجه مشكله .. تيار ممكن يجرفه .. لكن لما قرر إنه يقاوم ، نجح . |
| آمال | : لما قرر إنه يقاوم ، نجح .. جملة جميلة .. والأجمل إني بسمعها منك .. منك أنت يا أحمد . |
| أحمد | : أنا نسيت أقولك إن اسم الفيلم .. مقاومة . |
| آمال | : مقاومة !! الكلمة دى ممكن تتفهم غلط فى الظروف إللى إحنا فيها .. مع إن حياة الإنسان على الأرض ارتبطت بالمقاومة .. قاومنا الوحوش والطقس وقلة خبرتنا بطبيعة الأرض فى العصر البدائي .. قاومنا الهمجية ونفوذ القوه وبدأنا نسن قوانين تنظم حياتنا .. قاومنا الأمراض والأوبئة والزلازل والبراكين والأعاصير .. قاومنا طبيعة الأرض فى بعض المناطق .. قاومنا أزمات اقتصادية وآثار حروب شنها بشر ما قدروش يفهموا معنى السلام .. قاومنا صعوبة الانتقال وبقينا عايشين فى قرية صغيره .. حتى القمر وصلناله .. فاضل إيه .. تقاوم رغبه ملحه فى الهروب .. نقاوم مشاعر يأس سيطرت علينا .. جاوبني يا أحمد .. أنت موش ها تخسر كتير لو فكرت ثواني . |
| أحمد | : ( بصعوبة ) معاكي حق لكن ....... |
| آمال | : لكن إيه ؟ |
| أحمد | : عملنا إيه بكل ده .. إحنا تطورنا من الظاهر لكن الباطن هوه هوه .. ألبدله بقت أشيك .. لكن المخلوق الهمجي إللى لابسها ما اتغيرش . |
| أمال | : وإحنا فين دورنا . |
| أحمد | : إحنا مين ؟ |
| آمال | : إحنا إللى عندنا نصيحة ممكن نقدمها .. إحنا إللى عندنا كلمة ممكن تمس المشاعر . |
| أحمد | : دورنا إننا نبكى مع كل إللى فهموا وبكوا . |
| آمال | : نبكى !! |
| أحمد | : ده قدر كل مخلوق فاهم حقيقة الحياة على الأرض .. البدايةة بكاء و النهاية بكاء . |
| آمال | : لو كل أبطال التاريخ عملوا زيك كده كان البكاء بقى أمر دلوقتى .. فكر فى العلماء اللى سهروا . |
| أحمد | : فكرى فى الطغاة على مر العصور . |
| أمال | : فكر فى الشعراء اللى علمونا إزاى نحب . |
| أحمد | : فكرى فى إللى علمونا إزاى نخاف . |
| أمال | : فكر فى إللى بنوا . |
| أحمد | : فكرى فى هيروشيما و نجازاكى . |
| آمال | : فكر فى الأنبياء . |
| أحمد | : إحنا موش زيهم . |
| آمال | : بس عندنا منهجهم . |
| أحمد | : محدش عنده استعداد يسمع . |
| آمال | : هما ما كانوش بييأسوا من الإنسان . |
| أحمد | : الناس بتنسى . |
| آمال | : أمال إحنا دورنا إيه .. موش نفكرهم . |
| أحمد | : ( بعد لحظه صمت ) معاكي حق .. فعلا معاكي حق يا آمال أنت صح . |
| آمال | : ( بعد تنهيدة عميقة ) الحمد لله .. عبد الحكيم قدر بعد عشر سنين يختصر المسافة بينا .. الحمد لله .. و دلوقتى تسمحلى أسألك , ناوى تعمل إيه؟ |
| أحمد | : ( لحظه صمت أخرى ثم بابتسامة ) بكره الصبح ها دور على إسكريبت الفيلم و ها عدى عليكي .. يا ترى ها تكونى مستنيانى . |
| آمال | : طب والسفر . |
| أحمد | : حرام أسافر و أسيب فيلم زى ده . |
| آمال | : و بعد ما يخلص الفيلم . |
| أحمد | : بلدنا حلوه يا آمال .. أنا دلوقتى أقدر أقولك إني موش ممكن أبعد عنها .. صدقينى .. عبد الحكيم حرك حاجات كتير جوايا . |
| آمال | : يعنى خلاص .. مفيش سفر . |
| أحمد | : خلاص يا آمال .. مفيش هروب . |
فكس كادر
ســـــــــــــــــــــــــــتار
حسام الغمري
2002
تعليقات
إرسال تعليق