بدون ملابس / الجزء الثالث

أحمد	: يفهموا إيه بالضبط ؟! انتوا فاكرين إنكم بتقولوا حاجه .. انتوا من ساعة ما دخلتوا المسرح ما قولتوش غير شوية هرطقة فارغة .. وملهاش لازمة .. وعشان كده عمر الجمهور ده ما هايكون جمهوركم .. وأنا عاوزكم تفهموا حاجة مهمة ... زمن الفرسان أنتهي .. أنتهي  .. واللي فاكر نفسه قد السبق ينزل يلف فيه ... التراك  مفتوح للناس كلها
منى	: أستاذ أحمد .. أنت مقتنع بالكلام ده ؟
لمياء	: ما شاء الله .. أنتوا فاكرين إنكم تقدروا تعدلوا علي الأستاذ أحمد .. أنتوا فاكرين إنكم تقدروا تعرفوا أكتر مننا .. تقدروا تفهموا أكتر مننا .
حنان	أيوه إحنا نعرف أكتر منكم وبنفهم كمان أكتر منكم .. عارفة ليه يا نجمة يا كبيرة .. لأنكم شايفين الحياة من خلال نضارات وردية .. تقدري تقوليلي إمتي آخر مرة حسيتي فيها بالظلم ؟ .. إمتي آخر مرة حسيتي فيها بالسجن في أرض مفتوحة .. بالقهر.. إمتي حسيتي إن فيه حد في الدنيا بيمتص حقك الطبيعي في الحياة .. وإنك بموهبتك تستحقي وضع أحسن من اللي أنتي فيه ... إمتي حسيتي إن النغمة بقت نشاز .. وإن اللحن لازم يتعزف من جديد .
مجدي	: أستاذ أحمد .. إحنا بقينا في زمن الجرايم التقيلة فيه ما بترتكبش إلا بشكل قانوني .. وفي ظل إطار شرعي كمان .. علشان كده القوالب الجامدة لازم تتغير .. ما بقاش ليها أي لازمة .. موش مقتنع .. صح .. الدليل قدامك أهوه ( يصعد فوق مقعد موضوع فوق آخر بطريقة بهلوانية ) .. شوف قد إيه أنا تقيل .. ومع ذلك بقيت واقف علي كرسي فوق كرسي من غير ما اقع .. والسر بسيط صحابي ساندني .
أحمد	: أنتوا عاوزين تقولوا إيه بالظبط ؟!
الجميع	: عاوزين إجابة علي سؤال .
أحمد	: سؤال إيه ؟
الجميع	: النص صنيعه الإنسان .. واللا الإنسان صنيعه النص ؟
أحمد	: ( بدهشه ) النص صنيعة الانسان .
الجميع	: وللا الانسان صنيعة النص .
أحمد	: ( بدهشه أكبر ) النص .
الجميع	: الانسان
أحمد	: ( متلعثما ) النص .....
الجميع	: الانسان .. الانسان ..
	( تيمة غنائية تشرح ابعاد هذا السؤال يشارك فيها الجميع عدا لمياء )
الملقن	: ( بعد انتهاء الاغنية ) أنا مستعد أجاوب بالنيابة عن كل الموجودين ... يا حضرات الإنسان صنيعه النص .. تقدروا تقولولي إحنا أتخلقنا إزاي .. إتخلقنا بكلمة .. تقدروا تقولولي إحنا سبنا الجنة ونزلنا الأرض إزاي .. بكلمة .. وعلي الأرض إيه حالنا .. إمبراطوريات قامت وحكمت وحاربت وقتلت وظلمت .. الإمبراطوريات دى قامت بكلمة .. واتهدت كمان بكلمة .. يا حضرات الإنسان بيفقد حريته ويقضي ليالي في سجن ضلمه بكلمة من القاضي .. والقاضي ده بيحكم بكلمة من نص في كتاب قانون .. يا حضرات الإنسان بيسلم رقبته لعشماوي بكلمه .. يا حضرات الإنسان بيمتحن في كلمة وبيشتغل بكلمه وبيتجوز بكلمه .. صدقوني الكلمة دي حياتنا ..  والنص مهما كان فيه نقط ضعف لازم نفضل في ضله
أحمد	: أظن بعد الكلام اللي قاله الملقن معدتش فيه مبرر لوجودنا علي المسرح .
مجدي	: مين قال كده .
أحمد	: الواقع هوه اللي بيقول كده .
أمين	: الواقع اللي أنتم صنعتوه .. واللي إحنا لازم نغيره .
الملقن	: الواقع ده لو أتغير أنا هافقد وظيفتي .. هاموت من الجوع .. يا جماعة .. أنا علشان أفضل عايش لازم تفضل النصوص المتفصلة للنجوم الكبار .. النجوم اللي معدوش متفرغين لحفظ أدوارهم .. ومهما امتدت ليالي العرض برضه ما بيحفظوش .
منى	: ويحفظوا ليه ؟! ما دام فيه ملقن .
الملقن	: بالظبط كده .
حسناء	: ويا تري أنت مبسوط كده .. مبسوط بالدور ده ؟ِ!
الملقن	: طبعا مبسوط .. لأنه دور علي قدي .. مبضطرش فيه أواجه الجمهور وبفضل مستخبي .. أملي كلام وبس .. وده دوري اللي مبعرفش أعمل غيره .. طب تصدقوا إنه بدأ يجيلي اكتئاب لما بدءوا يشيلوا الكمبوشة من المسارح .. أنا كنت سعيد جوه الكمبوشه .. كنت بحس إنها بتحميني من الناس .. الكمبوشه كانت بتخليني أشترك في اللعبة وأنا في أمان موش خايف .. يا جماعة أنا موش زيكم أقدر أقف علي الخشبة وأواجه الجمهور .. أنا حياتي كلها في الكمبوشه .. ألقن النجوم كلامهم و بس .. وكل ده ها يضيع لو تخلصتم من النص .
تامر	: يعني أنت عاوزنا نفضل مساجين جوه النص علشان تفضل إنت مسجون جوه الكمبوشه .
الجميع	: إحنا لازم نتحرر من النص .
الملقن	: مقدرش أسيب الكمبوشه .
أحمد	: مينفعش تمثيل من غير نص .
الملقن	: مينفعش تلقين غير جوه الكمبوشه .
الكورس	: الكمبوشه سجن وإحنا هانحررك منه . ( تيمة غنائية تبرز رغبتهم في تحرير الملقن من سجن الكمبوشة )
شريف	: ( بأداء المسطول ) يا جدعان الموضوع أكبر من كده بكتير سيبوني أنا هاقنعه وبرضه بالارتجال .
حسناء	: لعبة .
شريف	: يا أبو حميد ( يصفر له ) يا بو حميد .
أحمد	: ( مشتركا في اللعبة ) موش قلت لك ميت مرة ما تفوتش عليا في البيت .. المدام بتزعل .
شريف	: دا أنا عازمك علي قعدة ميه ميه .
أحمد	: و أنا فعلا محتاجلها .. ( للمياء ) ما تفتحيش لحد يا ولية .. ( لشريف ) إحنا رايحين نشرب فين .
شريف	: في الترب .. عندك مشاكل .
أحمد	: مفيش مشاكل .. و أهي تبقي عظه .
شريف	: واد يا بليه .
منصور	( يقوم منصور بدور بلية ويحمل جوزه في يده ) أنا جاي .. بكر العروسة يا أستاذ أحمد .. أكتم .. أكتم .
شريف	: نهاره أبيض .
أحمد	: أبيض مقلم قلام محبه ومسا ... وهنا ع الناس الميه ميه .. مساء العسل .
شريف	: تخيل كده يا صاحبي لو الناس كلهم قلعوا .. ظابط المرور ها تشوفه تقول عليه إيه .
أحمد	: إيه .
شريف	: بتاع كارته .. ( ينفجر الجميع ضاحكون )
منصور	: ثد يا باثا .
شريف	: لأ .. وشوف بقي اجتماعات القمة العربية .. هاتكون إزاي من غير هدوم .
أحمد	: تقصد انهي اجتماع .
شريف	: اي اجتماع .
أحمد	: مهم كل سنه بيعملوا اجتماع .
شريف	: يا أخي تخيل اي اجتماع .. من غير هدوم .. هايكون ازاي
أحمد	: إزاي .
شريف	: ( بعد لحظة تفكير ) مسخرة ( ينفجر الجميع ضاحكون )
أحمد	: كفك علي دي .
شريف	( يكح ) الله يخرب بيت الصنف واللي بيضربوه .
لمياء	: ( برغبة في الاشتراك ) تصدقوا إن ده فعلا حل عبقري .. تخيلوا كل أسرة ممكن توفر كام في السنة لو ما اشتريتش هدوم خالص .
حسناء	كام يا اختي .
لمياء	: بحسبة بسيطة كده هاتوفر مبالغ هايلة .
حسناء	: ( كمذيعة في برنامج نسائي وبهدف اخراجها من الكادر ) وممكن عزيزتي المرأة استخدام هذه المبالغ التي سترفع نسبة الادخار الكومي ... في مشاريع عميكة عملاكة .. زي مثلا إنشاء مصانع إنتاج لولب بالريموت كنترول .
أحمد	: ريموت كنن ..
منصور	: ثد يا باثا .
أحمد	: ( بعد شرب نفس ) إزاي .
حسناء	: كده يفتح .. وكده يقفل .. وطبعا المشروع ده ها يزيد الدخل الكومي .. واللا أنتي يا اختي بتفضلي الواقي الذكري مع سي الأفندي الأستاذ بتاعك .
لمياء	: أنا في الحقيقة .
أحمد	: ( يخرج من لعبة المسطول ) إخواني .. إخواني يا قلالات الأدب .. ( محاولا تجاوز الموقف و مجاراة الكورس ) إحنا بعد وصلنا للحظة التاريخية دي .. واللي قدرنا فيها إننا نتخلص من النص .. ومن هدومنا بقينا علي أعتاب طفرة حقيقية .. إخواني .. أقول لكم كما يقول الزعماء دائما .. لقد قمنا بثورة
منصور	: ( متلقيا التهاني ) كان قلبي حاسس إننا هانقدر نعملها يا جدعان .
أحمد	: ( مقلدا هتلر في لعبة تمثيلية يبدأها هو ) واسمحوا لي اقترح إننا نعمل احتفالات الثورة في كل سنة .. ونحرق فيها قدام الشعب هدوم ، ونخطب خطب تبين حال الإنسان أيام ما كان بيلبس ، ونبين قد إيه كان معقد وسخيف ، قد إيه كان متمسك بالهدوم علشان بتساعده علي المنظرة والتنطيط ، وكان بيداري أجمل ما فيه .. جسمه .. ( يحيهم تحية هتلر المشهورة فيبادلونه نفس التحية ) ... وطالما هايبقي في احتفالات يبقي ضروري نطلع شعارات جديدة .
لمياء	: مثلا ... جسمك هو عنوانك .
تامر	: ابرز جسمك يا أخي .. مضي عهد الهدوم .
أمين	: إن الجامعات ليست أبراجا عاجية .. إنما هي طليعة المجتمع للتعرف علي أفضل الأجسام .. وسنحارب الميكروجيب وما فوق الميكروجيب
منصور	: إن التاريخ الإنساني سوف يتوقف طويلا بالفحص والدرس أمام عملية التخلص من الهدوم .. وستندهش بيوت الأزياء العالمية .. إني مستعد أروح لأبعد مكان في العالم .. لبيتهم .. بيت الموضة .. علشان ما يفصلوش بوصة قماش واحدة .
أمين	: أيها الأخوة المواطنون .. فليخلع العامل في مصنعه .. والفلاح في مزرعته .. والأستاذ في فصله .. والعالم في معمله .. من أجل سداد ديون هذا البلد .. وفقنا الله ووفقكم ..  والسلام عليكم ورحمة الله وبركاته . ( تصفيق من الكورس )
أحمد	: إذن .. لقد أثبتت التجربة جدوي التخلص من الملابس .
الجميع	نعم .
أحمد	: وها نحن علي أعتاب انطلاقة حاسمة ... ولكن خبروني بالله عليكم إلي أين ننطلق ؟‍‍
شريف	إلي أين ننطلق ؟ إلي أين ننطلق ؟ .. آه .. إلي الفضاء
حسناء	: لعبة .
الجميع	: ( بأداء أشبه بالمسلسلات الدينية القديمة ) أجل .. أجل .
أحمد	: ( الذي يتجاوب معهم ) ليس هذا وقت مزاح يا فتي .
شريف	: أنا لا امزح  .. أنا أخبركم بالحقيقة الدامغة ... فلننطلق صوب الفضاء .
الجميع	: أجل .. أجل
شريف	: فلنتخلص من الجاذبية كما تخلصنا من الملابس .. كي نطير ... نطير .. طيري .. طيري .. ( اللحن المميز لأغنية يا عصفورة )
الجميع	طيري .. طـــــــــــــــــيري
منصور	طيري .. طيري .. يا بني آدم
الجميع	يا بني آدم طير وحــــــــلق ما كفياك أفكار تخــــــــــلق ما أنت ياما عملت نصوص بتمثلها يومين وتلــــــــوص
الجميع	طيري ... طـــــــــــــــــيري طيري .. طيري .. يا بني آدم
أحمد	: الله يا ولاد .. أنا بحب الغنا الجماعي .. خصوصا في المسرح .. وبحب الغنا الفردي كمان .. الغنا كله حلو .
أمين	: بجد يا أستاذ أحمد .. طب أنا بألف أغاني .
أحمد	: وأنا بلحن .
أمين	: أنا بتكلم جد .. ما بهزرش .
أحمد	: وأنا كمان مبهزرش .. أنا صحيح ما بعملش شرايط .. لكن فيه ألحان كتير عملتها في مسرحيات مثلت فيها
لمياء	: وأنا برقص .
أحمد	: تاني يا لمياء .. إحنا موش قلنا بلاش الموضوع ده .. وبعدين انت عاوزة ترقصي بالمنظر ده .
لمياء	: جري إيه يا أحمد .. ماله المنظر ده .. هوه لو لابسه بدلة رقص هاتكون أقل من كده .. وبعدين اشمعني انت عندك موهبة في التلحين عاوز تتطلعها .
أحمد	: يا ستي التلحين ده هواية .. ولو مزعلاكي بلاش منها .
لمياء	:  أنا بقي عندي هواية  الرقص وموش ممكن استغني عنها .. دي ممكن تكسبني دهب .. وبعدين خليني أفرفش الجمهور ،  ده دفع تذاكر وما تفر جش علي حاجة تبسطه ..  ( للجمهور ) موش انتوا عاوزيني أرقص .
	( تسعد بتجاوب الجمهور الذي يوافقها علي الفور ) شفت يا أحمد .. ماتزعلش الناس بقي .. علشان خاطري .. ده أنا حبيبتك .
أحمد	: ( علي مضض ) أرقصي .. أرقصي يا لمياء لو ده هايبسطك .
لمياء	: ( بسعادة ) ميرسي يا حبيبي .. ( تتجه إلي أمين ) .. بقولك إيه يا واد .. عندك كلام كده من اللي ماشي اليومين دول .. كلام يجنن الناس .. يروشهم .. وأنا هارقص لك عليه رقصه تروش أبوهم أكتر وأكتر .
أمين	: ( الذي يبدوا غير سعيد بعرضها ) الحقيقية أنا مرة جربت أكتب كلام بالشكل ده .. بس أنا كان قصدي أضحك زمايلي اللي بيسمعوه مني .. وموش عارف الأستاذ أحمد ممكن يلحن كلام زي ده وللا لأ .
لمياء	: ملكش دعوة انت .. قول الكلام .. ولو عجبني هاخلي حماده يلحنه .. ولو اللحن رقصني كويس .. هاشتري الأغنية منك .. وأعملها كليب .
أمين	: اللي تشوفيه حضرتك .. ( يبدأ في إلقاء أغنية ذات كلمات ركيكة بأداء يحاول إبراز المعاني )
لمياء	: الله يا ابن الإيه .. كمل ..
أمين	: ( يكمل القاء الكلمات )
لمياء	: فجورة .. الحقني بالكوبليه التاني ، دي تكسب دهب  .
أمين	: ( وقد تحمس بسبب تشجيع لمياء يكمل الاغنية  )
لمياء	: ( لأمين ) أبوسك .
أحمد	: لمياء ...
لمياء	: عادي يا أحمد .. بوسه أخويه .. بوسه فنية .. انت موش سامع الكلام الهايل اللي كاتبة .
أحمد	: ده كلام هايف .. كلام يفسد الزوق .. كلام عاوز يتعمل له عمره .
أمين	: أنا قلت الكلام ده يا أستاذ أحمد .. والله أنا ألفته هزار
لمياء	: أهو الهزار ده ها يكسر الدنيا ، وهايخليك تعيش مبسوط ، وغني .. واحد يجيب الأورج اللي في الكالوس لحماده علشان يلحن لي الغنوة .. دي لازم اعملها كليب .
أحمد لمياء	: يا لمياء اعقلي بقي .. ده موش كلام يتلحن . : بقولك إيه .. لحن الأغنية علشان ما زعلش منك ..
	انت عارف زعلي .
شريف	: ( يدخل شريف ومعه الأورج ويعطيه لأحمد الذي يستسلم لرغبة لمياء ) الأورج يا أستاذه .. أنا رحت بنفسي علشان أجيبه .. لاني من زمان بتمني أشوف الوسط الجميل ده وهوه بيتهز .
أحمد	: ( وقد جلس أمام الأورج ) قول يا بني الكلام خلينا نخلص .
لمياء	: ( بنبرة ناعمة ) و انت يا روحي ها تلحن وانت مبوز كده .. دي المزيكا كانت تطلع نكد .. أنا عاوزاها حاجة تفرفش .. موش أنا حبيبتك .. موش أنا روحك .. موش أنا عقلك .
أحمد	: أيوه .
فاروق	: طيب .. غلبان .
لمياء	: ( بنبرة بها وعيد ) هوه مين ده اللي طيب و غلبان .
فاروق	: الجمهور اللي ها يتفرج علي رقصك العظيم .. أكيد إيديهم ها تورم من التصقيف .
لمياء	: بحسب .. ( لأحمد ) يللا يا حماده .. يللا يا حبيبي
أمين	: ( لأحمد قادما من أحد الأركان حيث كان يكتب كلمات الأغنية ) أنا كتبت الكلام لحضرتك يا أستاذ .. علشان تلحن علي طول
لمياء	: ( لأمين ) أبوسك .
أحمد	: لمياء ..
لمياء	: ما قلت لك يا حماده  بوسه فنية .
	: ( يبدأ أحمد في النظر في الورقة ثم يبدأ في العزف والغناء وتنهمك لمياء في الرقص بمجرد حفظها للجملة اللحنية وبالتدريج يشاركها بعض الكورس في ذلك )
أحمد	: ( بعد الأغنية والرقص يبدوا أحمد منفعلا من بعض عبارات الغزل التي قيلت من بعض الأفراد الكورس أثناء رقص لمياء والتي تصف جمالها وبراعتها وهي التي كانت ترقص كعالمة في حي شعبي ) مفيش فايدة ... بنهرج .. مستحيل العرض يكمل من غير نص .
لمياء	: معقولة يا أحمد هاترجع تتكلم عن النص .. أنت موش شايف الناس مبسوطة قد إيه .
أحمد	: مبسوطين طبعا .. وأنتي عارفة مبسوطين ليه .. مبسوطين علشان بيتفرجوا علي أراجوزات ... إحنا من غير نص شوية مهرجين .
لمياء	: بقولك إيه .. الحكاية موش حكاية نص .
الجميع	: حكاية البوسة اللي في آخر النص .
لمياء	: بوسني يا أحمد ... بوسني علشان ترتاح .
أحمد	: أنتي كمان يا لمياء فكراني بجري ورا البوسة .
لمياء	: الرغبة باينة في عينيك .. بتصرخ .. شوقك لشفايفي هايقتلك بوسني يا أحمد علشان ترتاح وتريحني .
أحمد	: أنا ما انكرش إني عاوز أبوسك .
فاروق	: قذر .
أحمد	: أمال أتجوزتها ليه يا حاج .. أنا فعلا يا لمياء عاوز أبوسك بس في إطار نص .. يعني إطار شرعي .
فاروق	: ( بأداء كلاسيكي مبالغ فيه جدا يتصاعد تدريجيا ) لو جريت ورا الشرعية يا بني موش هاتوصل لحاجة .. الشرعية دي كلمة مطاطة .. أتوجدت علشان تُخترق .. صدقني يا بني .. فيه قوانين إتوجدت علشان تخترق .. وقوانين تانية بتتغير كل يوم بعد ما بتثبت فشلها أما القانون الوحيد اللي بيفضل .
أحمد	: أيوه .
فاروق	: القانون الوحيد اللي بيتماشي مع طبيعة الإنسان ورغباته من يوم ما أتخلق لحد دلوقتي
أحمد	: خد نفس .
فاروق	: هو .. هو ...
أحمد	إرزع .
فاروق	: ( ينهار بجستات كلاسيكية ) هو قانون الغابة .. قانون الغابة .. قانون الغابة .
أحمد	: عارفة..  ( يقلد أداءه ) ده اللي الناس فيه وحوش وحوش وحوش .. وكانت هنا .. كل شغلك أبيض وأسود .. أنت لو قدمت في المعهد موش هاينجحك إلا الأستاذ زكي طليمات .. ولعلمك أنا برده .. معترض علي كلامك .
أمين	: أنت برده بتعرض .
أحمد	: أيوه بعترض يا ولد .. هوه أنا هاخاف منك علشان غنوة المكروباصات بتاعتك دي .
أمين	: ( يشكل يده كهيئة مسدس ويهم بالانتحار تمثيليا )
شريف	: حج بسطاويسي .
منصور	: أعقل يا خال .
حسناء	: لعبة .
أمين	: ( يصوب النار إلي نفسه ) أحمد يا ولدي .
أحمد	: ( الذي لا يجد بد من التجاوب مع هذه اللعبة ) آبااااااا .
أمين	: تعالي يا ولدي .. قرب .. قرب كمان .. أنا عاوز أقولك علي حاجة مهمة قبل ما أسيبك تواجه الحياة .
المجموعة	: ( صراخ وبكاء )
أحمد	: قول يا آبا .
أمين	: الحقيقة اللي بقالي سنين مخبيها عنك .
أحمد	: أتكلم يا آبا .. أنا سامعك كويس .
حسناء وحنان وسحر	:  ( كمأتم ريف ) يا لهوي .
أمين	: الحقيقة يا بن ضهري إن الضعيف هو اللي بيلجأ للقانون .. هو سنده وحمايته ... أما القوي ... ( يتأوه )
أحمد	: براحة علي نفسك يا با .
أمين	: أما القوي عمره ما بيحتاجله ... لأنه بياخد حقه بيده .. بدراعه .. وأنا كنت ضعيف يا بني .
أحمد	: معلش يا با .
أمين	: وأبوك العمدة قوي .
أحمد	: ربنا علي الظالم .
أمين	: غدر بيا وسرق أرضي .
أحمد	: الكلب ‍‍‍‍‍‍‍‍‍‍‍‍‍‍‍‍‍‍‍‍.
أمين	: بس أنا ماسكاتش .
أحمد	: عملت إيه يابا ؟
أمين	: بالليل سرقت بهايمه .
أحمد	: جدع .
أمين	: راح سارق أختك هنومه .
أحمد	: أختي ‍‍‍.
حسناء وحنان وسحر	: يا لهوي .
أمين	: وأمك بهانه .
أحمد	: أمي .
حسناء وحنان وسحر	: ياخرابي .
أمين	: وخالتك مونتجومري .
أحمد	: ( خارج الأداء التمثيلي ) مفيش في التراث الفلاحي مونتجومري .... مونتوجومري دا كان ..
أمين	: ( يقطعه ) والأكاده يا ولدي ... إنه سرقهم قدام البهايم .
أحمد	: ( يعود ) ما يسووش يابا .. أمي وأختي ما يسووش
أمين	: قمت أني ... قمت أني ...... ( يموت )
أحمد	( بصراخ ) آبااااااااا .
المجموعة	: ( غناء ) مسا الجمال .... والدلال .... والعرض رايح فين .... ع النص دور .
منصور	: ( مقلدا طرية المطرب محمد طه ) يا ليلي يا ليلي يا ليل .
المجموعة	: الله
حسناء	: جان جاك رسو يا جدعان .
منصور	: ( غناء  )       القوانـــــين كتــير والأنظـــمة كتيرة يا للي تهت في القوانين خدلك  كاسين بيرة لا الملكي بينفع ولا الرئاسي علي البرلماني دور
المجموعة	: ( غناء ) مسا الحمال .. والدلال .. والأمن ناوي علي إيه .. ربنا يستر ...
شريف	: ( ينسلخ من المجموعة ويبكي )
أحمد	: مالك يا حبيبي موش كنت مبسوط وبتغني معاهم .
منصور	: أنا عارف ماله يا باشا .
أحمد	: طب قول .
منصور	: ( كموال ) أصله نفسه يشوف وزير تنسحب منه الثقة ويستقيل .
المجموعة	: ( يعزفون اللحن المميز لألف ليلة وليلة بحناجرهم فيديره لهم مهندس الصوت )
أحمد	: ( كعراف ) شوف يا بن التفاحة ... يا لي عملت من شوية .. مناحة .. لو طلعت في العالي ميه .. وعلي بابا أتصاحب علي الحرامية .. هاتلاقي نط الحبل مابقاش بحبل .. بقي بزانة .. والمدرس مكمل شخصيته بخرزانه .. و الشاطر حسن بقي عريس لأمنا الغولة ويسيب لوليتا .. والدكتور بقي بيكشف علي المريض موش علشان يعالجه .. علشان الفيزيتا .
المجموعة	: بشر فرعون ملعون .... جته حمه وطاعون .
تامر	: ( بأداء متناغم مع المشهد  ) طب والحل إيه يا حكيم الزمان وعراف المكان والأوان .
أحمد	: نمشي كلنا من هنا .. ونرفع أيدينا للسما .. ولما الريح تهب .. ( اصوات رياح ) نصرخ ونقول .... يا رب .
المجموعة	: ( التي تحولت لحلقة ذكر ) يا رب .... يا رب .
لمياء	: واستمروا كذلك .. وهم لا يدرون ماذا هنالك .. ولكن الريح لم تهب .. بل جاء لهم أشرس ذئب .. ولما قالوا يا لهوي .. سعد الذئب وظل يعوي .. وعند إذن .
تامر	: (صوت الديك )
لمياء	مولاي ( تنام علي المسرح )
أحمد	: لمياء .. لمياء ... هيه ناقصة كده قدام الناس .
لمياء	: خلاص يا أحمد أنا زهقت .
أحمد	: أنتي موش كنتي مبسوطة وعمالة تعوي من شوية .
لمياء	: كنت مبسوطة وبعدين زهقت .
أحمد	: تصدقي أنا اندمجت معاهم فعلا .. يظهر الناس دول معاهم حق .. أنا أتأكدت إن عندهم طاقات هايلة والنص ما كانش قادر يستوعبها ..  وفهمت كمان إن الممثل لما بيختار دوره بنفسه بيعرف إزاي يأديه .. إزاي يقنع الناس بيه .. فرقتنا لازم تاخد قرار .. فرقتنا لازم تدقق في اختيار النصوص بعد كده .. أما النصوص المتفصلة .. المفروض ما يكونش ليها مكان بينا .
لمياء	: أحمد ... أنا ممثلة .. موش صاحبة قضية .
أحمد	: أنتي حتى ما متنفعيش تكوني ممثلة .. أنتي لازم تعتزلي يا لمياء .
لمياء	: بقي كده .. طيب يا أحمد .
أحمد	: أسمعوا يا رجاله .. إحنا لازم نتمسك بالحقيقة اللي وصلنا لها .. موش لازم نستسلم للواقع اللي بيفرضه علينا المؤلفين وظروف الإنتاج .. لأن الواقع ده أنتم ضحاياه .
الجميع	: أنت بتتكلم جد . ( يلتفون حوله فتتسلل لمياء إلي الخارج )
أحمد	: طبعا جد ... إحنا لازم نلاقي روحنا .. نتولد من جديد .. لازم نرفض أي نص ما يقدرش يستوعبنا كلنا .. أنا عارف إن ده صعب في ظل الظروف اللي إحنا فيها دلوقتي .. لكن تخطي الصعب هوه أول طريق للوصول للمستحيل ، جايز نتألم .
المجموعة	: جايز .
أحمد	: لكن الألم هو أول طريق الشفا .. جايز يهاجمونا ويحاربونا
المجموعة	: جايز .
أحمد	: لكن المهم هو احترامنا لنفسنا... صدقوني .. أنا كمان كنت بعاني من مشكلة .. وعشان كده مقدرتش أكمل العرض الليلادي .. ومشكلتي اني رغم كترة النصوص اللي بتتعرض علي .. موش قادر ألاقى نفسي في أي نص منهم .. موش لاقي النص اللي يعبر عن اللي جوايا .. وطول الفترة اللي فاتت دي ما كنتش عارف أنا مين .. وبعمل إيه .. صحيح عايش .. صحيح بكسب فلوس .. لكن عايش من غير حلم .. من غير أمل .. علشان كده ما كانش فيه حاجه بتكمل في حياتي للآخر .. كل شيء كان بينتهي علي غير إرادتي .. وده عملي عقده .. وده السبب اللي خلاني  مقدرتش أنطق كلمة .. كلمة .....
المجموعة	: ( بدون صوت يحركون شفاهم بكلمة الطلاق لمساعدته علي نطقها  )
أحمد	الط .... الط ... الطلاق .... الطلاق ... ( وكأنه تحرر ) حتى جوه التمثيل .. لكن أوعدكم أني أرفض كل ما هو موجود وقائم .
لمياء	: ( وقد ارتدت ملابسها ) أنا لقيت هدومي يا أحمد وبلغت البوليس .
منصور	: ضحكت علينا يا أستاذ سهيتنا علشان تخليها تلاقي هدومها .. علشان تفضلوا أنتوا الأتنين بس بهدومكم .. لكن لأ .. لأ يا أستاذ يا كبير .. إحنا موش ها نهرب .. و موش هانخاف من البوليس .
شريف	: أنت وقعت ولا الهوا رماك .
أحمد	: أنا بريء صدقوني .
منصور	: ( يصفعه علي وجهه ) أخرس .. أنت رمز للنص اللي ظلمنا .
أحمد	: قوليلهم علي الحقيقة يا لمياء ( تنطفئ إضاءة المسرح فجأة ويبقي ضوء خافت )
الجميع	: برده هانكمل .
منصور	: خطتك موش ها تنجح يا أستاذ .
أحمد	: نوروا المسرح .
لمياء	: أحمد .. أنا موش لاقياك يا أحمد .. أنا حاولت أروح من غيرك بس معرفتش .
الجميع	: وجوده بقي خطر علي وجودنا .
أحمد	: نوروا المسرح .
منصور	: ما كانش لازم تنسحب من لسانك .
حسناء	: ما كانش لازم تمثل علينا .
منى	: إحنا كنا عاوزينك تمثل معانا موش علينا .
لمياء	: أحمد أنا محتجالك علشان أقدر أوصل .
أحمد	: ( بصراخ ) نوروا المسرح .
تامر	: خلاص أوان التراجع فات .
حنان	: أنت سخرت مننا .
أمين	: عريتنا .
مجدي	: أنت من الأول ماشي في طريق رسمه لنفسك .
الجميع	: ضد إرادتنا .
سحر	: اللي زيك .. عمره ما ها يحس بينا .
الجميع	: إحنا حكمنا عليك بالعمي .. تمام زي الآلهة ما حكمت علي أوديب .
فاروق	: ستسير هائما بعصي تتحسس خطاك .. وتترك من خلفك أطفالا في حضن غيرك يرتعون .
الجميع	: ( ينزلون إلي الصالة مرددين نفس الجملة ) نوروا المسرح .. نوروا المسرح .
لمياء	: يا جماعة .. أنا ما بلغتش البوليس ... أنا كنت بضحك عليكم .
أحمد	: ( في بؤرة ضوء ) وضحكتي عليا أنا كمان يا لمياء .
لمياء	: يا أحمد أنا عاوزاك .. عاوزاك علشان نأكد نجوميتنا مع بعض .
أحمد	: البطولة في نص ضعيف ملهاش طعم .
لمياء	: البطولة في حد ذاتها هدف .
أحمد	: الهدف هوه اللي الناس كلها تتلم حواليه .
لمياء	: ملناش دعوة بحد .
أحمد	: منقدرش نعيش لوحدنا .. لازم تبقي في مشاركة .. لازم الكل يشارك يا لمياء .
لمياء	: يا أحمد كل واحد في الزمن ده عايش لنفسه وبس .
أحمد	: والنتيجة إيه ... بقينا عايشين من غير هوية .
لمياء	: إحنا خسرنا كل حاجة .
أحمد	: ( بقوة ) لأ .... ( يظهر وحده في الفراغ المسرحي ويتوقف ترديد عبارة نوروا المسرح مع مصاحبة موسيقي مهيبة ) أنا كسبت يا لمياء .. كسبت أحمد ... وموش مستعد أخسره تاني .. أنتي طالق .. طالق يالمياء ... طالق .
منصور	: ( وقد عاد المسرح إلي الإضاءة الكاملة ) هايلين يا أساتذة هايلين يلا بقي نحيي الجمهور .
أحمد	: بس الأول نغني لهم أغنية حلوة علشان يفتكرونا بيها .  ( يبدأ أحمد في غناء أغنية تنتهي بالتحية  )

                                    ستــــــــــــار

                                                               

حسام  الغمري

2000