انتيكا / الجزء الخامس

اللـوحة السادسة
المنظر		نفس المنظر السابق ولكن مع ارتفاع اكوام التراب
		يضاء المسرح وحسن يتمتم ببعض الاوراد الغير مفهومه دون مبالغة في وجود جميع الشخصيات الاخرى
الاب		طمني يا ابني .. القلق ح يقتلني .
حسن		لازم الحفر يقف .
علا		يعني ايه ؟ التعب ده كله راح علي الفاضي .. ده خلاص مفاضلش قدامنا الا ربع متر ونوصل للبوابة
حسن		موش ذنبي .
الاب		امال ذنب مين يا ابني .. محدش فينا شيخ غيرك .. قلت احفروا حفرنا .. ودلوقتي جاي تقولنا نوقف الحفر .
حسن		وموش بس كده .. تردموا اللي حفرتوه والا موش هايحصل طيب .. وكل ثانية تأخير فيها ضرر عليكم
عصام		ده جنون .. وانا حذرتكم من الأول .. لكن انتو جريتوا ورا الوهم وسلمتوا عقولكم للجاهل ده .
سعاد		عصام ما تغلطش .. اكيد في سر احنا موش عارفينه
حسن		تمام يا سعاد .. فيه سر .
علا		سر ايه ؟
حسن		اسالي الحاج .. والدك .
علا		سر ايه يا بابا .
الأب		انا زيك موش فاهم حاجة .
علا		( لحسن ) ممكن تتكلم على طول وتبطل اسلوب الفوازير بتاعتك دي .
حسن		يبدأوا يردموا الاول قبل ما نتكلم .. التأخير فيه خطر عليكم .
الأب		محدش هايتحرك الا لما نفهم .. احنا موش لعبه في ايدك .. نحفر وبعدين نردم .
حسن		زي ما تحبوا .. بس لازم تعرفوا اني قلتلكم احفروا علشان مصلحتكم .. ودلوقتي بقولكوا اردموا برده علشان مصلحتكم .... سلاموا عليكوا ( يهم بالخروج )
الأب		( الذي يخرج مسدسا من جيبه ويعود لصلابة رجل الشرطة ) استنى عندك .
حسن		( يلتفت له ببرود )
الأب		ولادي يعرفوا ان خطي سلاسل دهب ..   لاني بتحكم في ايدي كويس .. بس اللي ميعرفهوش اني كنت احسن واحد في النشان في الوزارة .. وطول الوقت كانت مصلحة البلد ان ناس معينه تختفي من غير محاكمة ، جماعات اسلامية .. تكفير وهجرة ، تجار مخدرات .. مرشدين .. وناس تانية كبار قوي الشيطان لعب بعقلهم زي ما بيلعب بعقلك دلوقتي .. علشان كده سلموني المسدس ده ، من غير ورق .. علشان لو حصل حاجة ما يبقاش عليهم دليل .. وكنت في عز الضهر وبطلقه واحدة من بعيد بصفي اللهم اللي هما عاوزين يخلصوا منه .. وآخد مكآفأة 100 جنية أداء متميز .. ولما طلعت معاش ما طلبوش مني المسدس .. انا كمان مكنتش عاوز ارجعه .. يعني لو ما اتكلمتش هاقتلك .. وهادفنك في الحفره .
سعاد		بابا .
الاب		موش عاوز ولا كلمه والا هادفنك انتي كمان .
حسن		يا حاج الرصد اللي تحت قوته زادت .. وخد سلطه عليكم .. وكل ما تتأخروا في الردم كل ما اذيته ليكم هاتكون اكبر واخطر .. والبتاع اللي انت ماسكه ده ما يخوفنيش .. انا معايا اللي يحموني كويس قوي
سعاد		موش انت يا حسن كنت هتآخد التلت علشان بتتعامل مع الرصد ده .
حسن		ايوه يا سعاد .. وكنت زيكم بحلم بالفلوس .. انا ياما لقيت اماكن زي المكان بتاعكوا ده .. وبدأت الشغل فيها .. بس للاسف .. عمري ما نفذت في مكان عليه القيمة .. وبنصيبي في الفلوس كنت هابنيلك قصر في التجمع .. وفيه حمام سباحة دورين فوق بعض وما تسألنيش ازاي لانها شغلتي .. وكنا هانسافر نتفسح ونعمل كل اللي احنا عاوزينه .. انا يا سعاد بحبك من زمان وموش قادر اتكلم .. بحبك من اول ما شفتك .. وكنت بتعمد استناكي في محطة الاتوبيس وانت رايحة الجامعة وانت كمان راجعه منها .. كنت اتمنى لو كان ابويا ماختفاش ودخلني الجامعة زيكم .. ولما جت لي فرصة اني اخاوى جن مترددتش علشان ابقى غني واقدر اتقدم لك .. وكنت نادر لو ربنا حقق لي الحلم ده اعمل خير كتير .. واوزع فلوس على الغلابة اللي في العشوائيات .. ودول ما بيعضوش الايد اللي بتتمد لهم .. بس هيه تتمدلهم .. لكن ابوكي ضيع كل ده .
الاب		( وقد عاد لنبرته الحالمة ) انا يا ابني ، ربنا يسامحك .
حسن		ايوه انت يا عم الحاج .. انا كنت بسهولة اقدر اتعامل مع الرصد اللي تحت لولا القوة اللي انت اديتهاله .
عصام		انتوا هاترجعوا تسمعوا للاوهام دي تاني .
سعاد		استنى يا عصام علشان نفهم .. موش سهل اللي احنا فيه ده .
عصام		تفهمي ايه ؟ الكلام ده كله تخاريف .. ولعلمك .. احسن لنا ان الفلوس دي ما طلعتش .. ده اذا كان فيه حاجة تحت من اصله .
الاب		لا فيه كنز في البيت .. انا متأكد يا عصام يا ابني .. كنا قبضنا على واحد من الدجالين  زمان .. زمان قوي .. وقالي بيتك تحته كنز .
عصام		يا بابا .. مصر كلها كنوز ، موش البيت ده بس .. لكن موش بالجهل هانوصل لها .
الأب		( بحده ) ما انا علمتكم وما استفادتش من علامكم حاجة ..  معاشي بأكلكم منه لحد دلوقتي  بدل ما تشتغلوا وتدوني وتعوضوني سنين الشقاء .
عصام		يمكن يا بابا الفايده من التعليم تبان في لحظة زي دي .. اللحظة اللي العتمه فيها بتسيطر على كل حاجة .. انا مكنتش بحب التدريس لكن موافق دلوقتي اشتغل مدرس بالحصة لحد ما اتعين .. وواحده واحده المركب هاتمشي .. اهم حاجة يا بابا ضميرك اللي كان تاعبك يرتاح .. افتكر كلامك يا بابا من كام يوم .. النهاردة عرفنا كمان ان تعب ضميرك المفروض يكون اكبر .. سيبه يمشي يا بابا علشان نكسب وقت نفكر فيه بجد ازاي نصلح امورنا .. دي يمكن تكون فرصتنا الاخيرة .
علا		فرصتنا الوحيده هيه حسن .. لازم يكمل اللي بدأه .. انا خلاص .. حسيت بطعم الفلوس .. وموش ممكن اعيش في الفقر تاني .. وموش طعم الفلوس بس هوه اللي حسيته .. افهموني .. انا مقدرش ارجع للي كنت فيه .
الأب		( لحسن ) حاول تاني معاهم يا ابني وربنا ح ينصرك عليهم .
حسن		بقوا اقوى مني وانت السبب .
الأب		تاني هاتقول انا السبب .. انا عملت ايه بس في دنيتي غير اني كنت بنفذ اللي بينطلب مني علشان اعيش انا والعيال .
سعاد		حسن .. علشان خاطري انا .. لو انت بتحبني زي ما بتقول فهمني ايه اللي حصل .. ايه اللي خلاك توقف الشغل .
حسن		حاضر يا سعاد .. ها فهمك .. ايه اللي بيقوى الشيطان علينا .
سعاد		ضعفنا .
حسن		مظبوط .. يعني احنا لو مضعفناش نكسب .. صح .
سعاد		صح .
حسن		ولو ضعفنا هوه يكسب .. حسبه بسيطه جدا يا اساتذه .. بس موش عارف ليه دايما الاساتذة بينسوها .
علا		انت هاترجع للالغاز تاني .
حسن		لا الغاز ولا حاجة .. الرصد اللي تحت جن كافر .. زي الشيطان .. مهو برده جن كافر .. وانا من اول يوم حفر وانا بتعامل معاه .. ولولا كده ماكانش سنتيمتر واحد اتحفر .. لحد الطمع ما سيطر على الوالد .. وقرر انه يقتلني بعد  التاجر ما يشيل الحاجة ويسلمنا الفلوس .. استكتر على النص اللي هوه ابسط حقوقي .. والطمع ، يقل ما جمع .. و علشان نيته دي الرصد خد قوة فوق قوته .. ومبقاش حد هايقدر يآخد منه الكنز اللي تحت طول ما الوالد عايش وليه علاقه بالمكان .. ( مقتربا من عصام ) صح الكلام اللي انا بقوله ده وللا تخاريف جهله يا استاذ .
عصام		( يهرب بوجهه )
حسن		جاوب .. الوالد طلب منك تقتلني وللا لأ .
عصام		( يبتعد في حيره )
علا		اتكلم يا عصام .
سعاد		( التي تمسك ذراعيه بقوة وتهزة وكأنها تريد ان تسقط منه الاجابة وبصراخ ) اتكلم .. سكت دلوقتي ليه .. كنتوا هاتقتلوه .
عصام		ايوة .. بابا طلب مني ده .. بس انا مكنتش هاقتل .. عمري ما كنت هاقتل .. وكان عندي امل بابا يرجع في كلامه .. او اي حاجة تحصل .
حسن		عن اذنكم ( ينصرف )
علا		يعني ايه ؟ كل حاجة ضاعت .
سعاد		ابوكي السبب .
علا		هانرجع للصور تاني .
سعاد		ابوكي السبب .
عصام		فكروا ازاي نبدأ من جديد
علا		ماما قالت لي مره انها بتكرهه .
سعاد		علشان كان دايما بيضربها .. بيخوفها .
عصام		لو مفكرناش هانبات في الشارع .. اعلان الطرد انا استلمته من اسبوع وخبيته عنكم علشان ما تترموش اكتر في حضن حسن .
الاب		ولاد عمي هما اللي كسبوا في الآخر .. كانوا زمان بيترعبوا منى .. ودلوقتي خلاص مبقتش اخوف نمله .
علا		انا موش عاوزه اعيش خلاص .. انا هاموت نفسي
		( تجري صوب الداخل وخلفها يهرول عصام مناديا عليها بينما تقف سعاد في ذهول وهي تتابع والدها الذي يضع فوهة المسدس على راسه ويطلق طلقة ترديه )
إظــلام
اللـوحة السابعة
المنظر		نفس المنظر السابق يضاء المسرح حيث يقف وكيل نيابه وضابط شرطه  كبير ومجموعة من الجنود وفي المنتصف تبدوا جثة الأب والابناء الثلاثة وايضا رجل الاعمال عنتر حسانين
الوكيل		: وبعد المعاينه قررنا تشريح الجثه وحبس كل من ، عصام حسني حسانين وسعاد حسني حسانين وعلا حسني حسانين بتهمة القيام بأعمال حفر بهدف التنقيب على الآثار لمدة 15 يوم مع مراعاة التجديد كما أمرنا بتسليم المنزل الى مالكه السيد عنتر سالم حسانين بموجب الحكم القضائي رقم 2011 لسنه 2004
		( ينصرف وكيل النيابة ويقوم المسعفون بحمل الجثه والجنود باقتياد عصام وسعاد وعلا ويبقى عنتر و  الضباط )
الضابط		: البيضة بقت متقشرة على الاكل يا عنتر بيه .
عنتر		: اهم حاجة تأمنا كويس واحنا بننقل الحاجة اللي تحت .
الضابط		: آخر حاجة تقلق منها هيه الأمن .. دي لعبتي .
عنتر		: وانا الفلوس لعبتي .. ونصيبك هايوصلك لحد عندك مغسول ومرشوش كمان لو تحب .
الضابط		: ممكن اسألك سؤال .
عنتر		: طبعا يا باشا .. ده احنا شركاء .
الضابط		: كان ممكن ترمي للراجل ده قرشين تخرجه بيهم بدل الفيلم ده كله .
عنتر		: بابا كان بيكرهه .. ياما ازاه في أكل عيشه .. وياما هدده بسلطة الداخلية .
الضابط		: ( وقد فهم المغزى ) بس الواد حسن ده طلع حكاية .
عنتر		: لا حكاية ولا حاجة .. ده واد غلبان بيسترزق .. كل الحكاية انه رسم الرسمة بضمير .. اصله هوه كمان ليه تار عند المرحوم .. اصل ابوه كان محامي بدقن .
الضابط		: علشان كده .
عنتر		: مهي الدنيا دواره .
الضابط		: اهم حاجة حسن يشهل في الحفر .. عاوزين نخلص
عنتر		: كله بمعاد يا حضرة الظابط .. كله بمعاد .
الضابط		: سؤال أخير .
عنتر		: أأمرني .
الضابط		: تفتكر هاتدور علينا في يوم احنا كمان .

ستار النهاية حسام الغمري 2005